Real Madrid kryeson tashmë i vetëm La Liga-n pas fitores 3-1 ndaj Barcelonës në El Clasico. Të besuarit e trajnerit Ancelotti shfrytëzuan mjaft mirë mundësitë në momentin e duhur, duke u shkaktuar rivalëve humbjen e parë në kampionat.
Ishte Karim Benzema ai që hapi serinë e golave për madrilenët në minutën e 12’ të takimit. Francezi u tregua i saktë para portës, teksa Marc-Andre ter Stegen priti goditjen e parë të Vinicius Jr, por nuk arriti dot të ndalë veteranin e Real Madrid. Përpara mbylljes së pjesës së parë, të zotët e shtëpisë do të shënonin një tjetër gol, dhe kësaj rradhe protagonist ishte Fede Valverde. Mesfushori i talentuar goditi mjaft bukur topin në hyrje të zonës, duke mos i lënë shans Ter Stegen të reagonte si duhet. Pjesa e parë u mbyll me avantazhin e dyfishtë të galaktikëve.
Në të dytën Barcelona ia doli të gjente rrjetën vetëm në minutën e 83’ të takimit me Ferran Torres. Sulmuesi dërgoi topin në rrjetë pas pasimit të Robert Lewandowski, dhe për një moment u krijua ideja se katalanasit mund të përmbysnin rezultatin. Gjithsesi, madrilenët menaxhuan mjaft mire situatën, duke pritur momentin e duhur që mbrojtja katalanase të linte hapësira të lira.
Si rezultat, Real iu akordua një penallti në minutat shtesë të takimit. Rodrygo u tregua i saktë nga pika e bardhë dhe kampionët në fuqi të Spanjës vulosën fitoren 3-1 përballë rivalëve historikë.
Pavarësisht paraqitjeve të mira në La Liga, disfata në El Clasico mund të rezultojë mjaft e kushtueshme për trajnerin Xavi. Barcelona rrezikon të eleminohet nga grupet e Champions League, dhe në këtë rast, La Liga do të mbetet i vetmi trofe madhor që katalanasit do të jenë ende në garë për të triumfuar. Megjithatë, gjithçka mbetet ende e hapur në Spanjë, teksa diferenca mes Real-it kryesues dhe Barçës është vetëm 3 pikë.