El Clasico-ja e së dielës do të jetë një sfidë mjaft e rëndësishme në La Liga, teksa Barcelona dhe Real Madrid kryesojnë renditjen e kampionatit spanjoll me pikë të barabarta. Sfida ka një rëndësi të veçantë për katalanasit, duke qenë se shanset më të mëdha për të fituar një trofe janë në La Liga, ku Barcelona ka pësuar vetëm 1 gol deri tani.
Të besuarit e trajnerit Xavi barazuan 3-3 në sfidën e fundit në Champions League ndaj Inter, një rezultat që sipas të gjitha gjasave do të skualifikojë spanjollët nga grupi. Kjo është një tjetër arsye se përse katalanasit duhet të justfikojnë tashmë veten në La Liga.
Real Madrid nga ana tjetër ndodhet në një pozicion më të mirë, teksa ka siguruar tashmë kualifikimin në Champions League, si dhe ka shfaqur nivele të larta loje në kampionat. Përveç portierit Courtois, madrilenët nuk kanë mungesa në këtë sfidë dhe e vetmja dilemë për trajnerin Ancelotti mendohet të jetë mesfusha. Galaktikët pritet të bëjnë presing të lartë në fushë, por kampionët në fuqi të Spanjës do të fokusohen përsëri tek kundërsulmet, duke qënë se kjo është dhe 1 nga pikat më të dobëta të kundërshtarit.
Nga krahu tjetër, Ter Stegen pritet të jetë përsëri vendimtar për Barcelonën, duke marrë parasysh kualitetin e kundërshtarëve në sulm. Mbrojtja është reparti ku mund të shohim ndryshime, pasi trajneri Xavi padyshim që ka mbajtur shënime nga përballja me Inter.
Sipas gazetarit sportiv Guillem Balague, El Clasico-ja mund të shërbejë si një leksion për veteranët në ekipin katalanas, dhe specifikisht Pique dhe Sergio Busquets, që nuk po performojnë në nivelin e tyre më të mirë. Presioni është i lartë dhe mbi trajnerin Xavi, duke qënë se Barcelona shpenzoi plot 145 milionë euro në merkaton e verës për të përmirësuar ekipin.
