Ardhja e Lionel Messit në Paris ishte padyshim një nga momentet më të paharrueshme në historinë e PSG. Mbi 150,000 fanella me emrin e argjentinasit, të cilat ishin në stok në dyqanin online të parizienëve, u shitën brenda 7 minutash.
Francezët nënshkruan me Neymar 4 vite më parë, transferim ky që u prit me mjaft entuziazëm nga tifozët. Por afrimi i numrit 10 të Barcelonës, duket se tejkaloi çdo pritshmëri që fansat e klubit nga Parisi, kishin për merkaton e verës. Në të njejtën kohë, dhe vet lotjari është pritur në mënyrë të jashtëzakonshme, duke u mbështetur fort nga shokët e skuadrës dhe drejtuesit e klubit, në këtë hap të madh për karrierën e tij.
Neymar madje, i ofroi argjentinasit fanellën e tij me numrin 10. Messi gjithsesi nuk e pranoi dhe vendosi të mbajë numrin 30, edhe ky me simbolikë të veçantë për lojtarin. 30-a është numri që Leo mbajti veshur në vitet e para të debutimit të tij me Barcelonën, kur ishte ende një adoleshent.
Në seancën e parë stërvitore me klubin e ri, argjentinasi dukej konfuz, sidomos gjatë stërvitjes në palestër. Djali i trajnerit të PSG, Sebastiano Pochettino, i sugjeroi një rutinë të re stërvitore 6 herë fituesit të Topit të Artë. Megjithatë, diçka e mjaft e rëndësishme nuk ka ndryshuar që nga koha kur lojtari aktivizohej ende me Barcelonën. Loja në fushën e blertë ndërtohet rreth tij!
Kjo gjë është vënë re në të gjitha ndeshjet e zhvilluara në kampionat, por dhe në Champions League. Neymar gjithashtu ka ndryshuar pozicionin në fushë, duke u vendosur përsëri në rolin e tij natyral si lojtar krahu. Rreshtimi momental i PSG i përshtatet mjaft mirë Messi dhe Neymar, të cilët kanë zotërimin e topit ndër arsenalet e tyre kryesore.
Gjithsesi, ardhja e Messit në ekip dhe ndryshimi i lojës vë disi në pikëpyetje rolin e Kylian Mbappe. Ndryshe nga Neymar dhe Leo, francezi preferon më shumë hapësirat e gjera, sesa zotërimin e topit në hapësira të ngushta. Ky mund të jetë një problem potencial për Mauricio Pochettino.
