Sipas Sportsmail, trajneri hollandez i Ajax, Erik ten Hag, është duke mësuar anglisht duke u përgatitur paraprakisht për një transferim në Premier League. Tekniku përflitet prej kohësh për t’u vendosur në krye të pankinës së Manchester United, por me një anglishte të mirë, Ten Hag e ka të hapur rrugën tek të gjitha klubet e Premier League.
Por duke u bazuar te lajmet e fundit, zemra e hollandezit rreh për një transferim në Old Trafford. Pas bisedave të brendshme mes përfaqësuesve të Ajax dhe trajnerit, bordi i klubit e ka të qartë tashmë dëshirën e Erik ten Hag për t’u larguar në verë.
Në rast se arrihet një marrëveshje mes këtij të fundit dhe United, hollandezi do të sjellë në Angli dhe ndihmësin e tij Mitchel van der Gaag. Verën e kaluar Ten Hag ishte një nga pretendentët kryesorë për të marrë drejtimin e Tottenham Hotspur. Gjithsesi, burime shumë pranë klubit londinez bënë me dije se barriera e gjuhës ishte një problem gjatë bisedimeve.
Ndërkohë një tjetër lajm shumë interesant që po qarkullon së fundmi është linkimi i Carlo Ancelottit me stolin e “Djajëve të Kuq”. Emri i trajnerit të Real Madrid u shfaq krejt papritur mes alternativave të tjera për stolin e United. Megjithatë, duhet qartësuar se italiani nuk është një nga emrat që kryeson garën. Bordi i Manchester United mund të hyjë në bisedime me Ancelottin, vetëm nëse dështon të sjellë në Old Trafford Mauricio Pochettinon, Erik ten Hag ose Luis Enriquen.
Por cila është situata e Carlo Ancelottit në Madrid? Momentalisht galaktikët kryesojnë La Ligan dhe janë pretendentët kryesorë për të ngritur në fund trofeun. Gjithsesi, një eleminim në Champions League nga PSG nuk do të pritej mirë nga fansat dhe presidenti Perez. Por kjo do t’i hapte rrugë largimit të italianit nga Santiago Bernabeu, dhe pse jo një transferimi të mundshëm tek United.