Sipas raportimit të “The Sun” në Angli, drejtuesit e Real Madrid kanë bërë ofertën e tyre përfundimtare për shërbimet e superstarit të Dortmund, Erling Haaland. Gjigandët spanjollë kryesojnë tashmë garën për kartonin e bomberit, pavarësisht se ky i fundit është dhe nën radarin e klubeve elitare të Premier League.
Portali spanjoll “Sport” bëri me dije se përfaqësuesit e Haaland kanë qënë këto kohë në bisedime me drejtuesit madrilenë, pas një oferte nga ana e këtyre të fundit. Lojtari norvegjez menaxhohet nga super-agjenti Mino Raiola, dhe thuhet se ditën e premte pati një takim mes tij dhe përfaqësuesëve të Real Madrid në Monaco.
Ky mund të jetë fundi i tentativave të Manchester United, Chelsea dhe Manchester City, për të sjellë në Angli sulmuesin. Kjo pasi sipas burimeve jo-zyrtare, ekziston tashmë një marrëveshje mes Real dhe Dortmund për të bllokuar negociatat me klubet e tjera. Manchester City i Pep Guardiolës ishte nga ekipet favorite për të arritur një marrëveshje me Haaland, ndërsa United ka vite që monitoron sulmuesin dhe dëshira për ta sjellë atë në Old Trafford nuk ka ndryshuar.
Por vet lojtari mendohet se ka dëshirë që të luajë në Spanjë. “Los Blancos” duan të përfitojnë me çdo kusht shërbimet e tij, sidomos pas lajmeve të fundit se Kylian Mbappe ka ndërruar mendje për një transferim të mundshëm në Madrid. Pas përballjes së PSG me Real në Champions League, francezi përsëriti dhe një herë tjetër se ende nuk e ka vendosur se çfarë vendimi do të marrë në të ardhmen.
Besohet se tashmë gjithçka është në dorën e lojtarit. Duke qënë se mes Mino Raiola dhe Real Madrid ekziston tashmë një “marrëveshje xhentëlmenësh”, nëse Haaland dëshiron të largohet në fund të sezonit Real Madrid do të jetë zgjedhja e tij e parë, por ende jemi larg zyrtarizimit të lëvizjes.