Një vit pasi Euro 2020 u shty për shkak të pandemisë së COVID 19, planet mbi zhvillimin e kompeticionit janë ende të paqarta. Një ndër dilemat kryesore mbi Europianin e pazakontë të këtij viti ka të bëjë me praninë e fansave në stadiume. Sipas raportimeve më të fundit, duket se UEFA kërkon nga qytetet organizuese praninë e fansave në stadium. Por a është kjo e mundur?
Presidenti i UEFAs, Aleksander Ceferin e bëri mjaft të qartë qëndrimin e tij:
“Ne kemi parashikuar disa skenarë, por ajo që mund të themi me garanci është fakti se opsioni që ndeshjet e Euro 2020 të luhen pa spektatorë nuk ekziston. Çdo qytet organizator duhet të garantojë se do të ketë fansa gjatë ndeshjeve në stadiumet e tyre.”
— Aleksander Ceferin
Gjithsesi, në një deklaratë të mëvonshme, UEFA ka zbutur disi qëndrimin e saj. Ajo është shprehur se asnjë qytet nuk do të përjashtohet nga organizimi i ndeshjeve të Euro 2020, nëse vjen me një propozim për zhvillimin e sfidave me dyer të mbyllura.
Ndërkohë deklarata e Aleksander Ceferin është pritur me skepticizëm nga mjaft organizatorë dhe drejtues lokalë të shteteve që pritet të jenë pjesë e hartës së stadiumeve të Euro 2020. Një nga reagimet ka ardhur nga kryetari i provincës së Munich në Gjermani, Dieter Reiter. Ai u shpreh për Bild:
Një nga reagimet ka ardhur nga kryetari i provincës së Munich në Gjermani.
Dieter Reiter u shpreh për Bild:
“Është thjesht e pamundur të përcaktohet në këtë pikë nëse pandemia e Covid 19 do të na lejojë apo jo të kemi fansa në stadiume, në muajin qershor.”
Kujtojmë se Munich është parashikuar të presë 4 ndeshje të Euro 2020, gjatë periudhës 15 qershor – 2 korrik. Ndërkohë UEFA i ka vendosur një afat deri në 7 prill, 12 qyteteve pritëse të kompeticionit për të dorëzuar një plan të detajuar mbi mënyrën e organizimit të ndeshjeve nga ana e tyre. Vendimi final nga qeveria e futbollit europian, pritet të bëhet i ditur në 20 prill, në mbledhjen e parashikuar të kongresit.