Mesfushori i përfaqësueses angleze, Declan Rice ka pësuar një dëmtim në gju, i cili mund t’i kushtojë atij finalet e Europianit që fillojnë në verë. Sipas “The Telegraph”, mesfushori pësoi dëmtimin rreth minutës së 60-të, gjatë ndeshjes së Anglisë me Poloninë. Pavarësisht kësaj, ai arriti të përfundonte ndeshjen pa qenë nevoja të zëvëndësohej, duke u shpallur dhe lojtari më i mirë i takimit. Kujtojmë se “3 Luanët” arritën të merrnin një fitore mjaft të rëndësishme në shifrat e ngushta 2-1.
Që prej asaj ndeshjeje, Rice është shfaqur me një mbrojtëse rreth gjurit të tij për të parandaluar përkeqësimin e situatës. Ndërkohë mesfushori është në pritje të rezultateve të skanerit që do të tregojë më mirë shkallën e dëmtimit. Ajo që është e sigurt është se Rice do të mungojë në ndeshjen e West Ham përballë Wolverhampton Wanderers.
Sipas tabloideve prestigjoze në vend mesfushori pritet të jetë jashtë fushave të blerta për të paktën 6 javë, megjithëse ky informacion nuk është zyrtar. Megjithatë, në qoftë se kjo është e vërtetë, Rice mund t’ia dalë me sukses dhe të bëhet pjesë e përfaqësueses angleze në Euro 2020. Por, në qoftë se lojtari ka nevojë për një operim atëherë me shumë mundësi ai do t’i mungojë ekipit të Southgate.
22 vjeçari ka zhvilluar paraqitje shumë të mira me West Ham këtë sezon, duke mos humbur asnjë minute loje. Përveç Gareth Southgate, trajneri i West Ham, David Moyes po shpreson gjithashtu për lajme pozitive. Ai është i ndërgjegjshëm për rolin Rice në skuadrën e tij, dhe rëndësia e lojtarit është shumë e madhe. Sidomos në këtë pikë ku West Ham synon të luajë në kompeticionet europiane sezonin e ardhshëm.
Humbja e Rice do të ishte mjaft shqetësuese për Anglinë. Në repartin e “3 Luanëve” janë të shqetësuar në të njejtën kohë dhe për gjendjen e Jordan Henderson, dhe një tjetër dëmtim mund t’i kushtojë jo pak ekipit të Southgate.