Bota e sportit ishte në shok ditën e shtunë, teksa gjatë ndeshjes Danimarkë – Finlandë, kapiteni danez Christian Eriksen pësoi një arrest kardiak dhe u rrëzua në fushën e blertë. Drama ishte e madhe, jo vetëm për shokët e tij të kombëtares, por për çdo tifoz në stadium dhe ata që ndiqnin live transmetimin televiziv. Fatmirësisht, gjithçka është mbyllur mirë dhe Eriksen është plotësisht i ndërgjegjshëm dhe drejt rikuperimit të shpejtë, në një spital privat në Kopenhagen.
Gjithsesi, pikëpyetjet kanë qenë të shumta mbi episodin, dhe disa prej tyre i është përgjigjur mjeku i kombëtares daneze, Morten Boesen. Ky i fundit deklaroi:
“Filluam menjëherë procedurën e shpëtimit dhe ia dolëm. Sa afër ishim që ta humbisnim Eriksen? Këtë nuk mund ta them, por ai u bë i ndërgjegjshëm pas vetëm 1 defribilacioni, pra mjaft shpejt.”
Për ngjarjen komentoi dhe trajneri i Danimarkës, Kasper Hjulmand, i cili shprehu mirënjohjen e tij për ekipin e mjekëve dhe ndërhyrjen e tyre:
“Ishte fantastike të shikoje Eriksen të buzëqeshur përsëri. Shpejtësia me të cilën ata (ekipi mjekësor) reaguan ishte deçisive. Koha ndërmjet ndodhjes së eventit dhe marrjes së ndihmës është faktori më i rëndësishëm, dhe kjo ndodhi mjaft shpejt. Në spital janë duke kryer një seri testesh se përse mund të ketë ndodhur, në mënyrë që të marrim përgjigjet që na interesojnë të gjithëve. Testet e kryera deri më tani janë pozitive, por ende nuk kemi një ide se pse ka ndodhur.”
Hjulmand gjithashtu shtoi se Erikesn ishte i shqetësuar më shumë për skuadrën, dhe se donte të rikthehej sa më shpejt të ishte e mundur në fushën e blertë. Ai shtoi se Christian është një njeri i jashtëzakonshëm, por tani, ekipi duhet të mbledhë veten për të luajtur ndeshjet e mbetura të Euro 2020 pa kapitenin e tyre në fushë.