Euro 2020: Gareth Southgate i ndërgjegjshëm për rrezikun danez

Anglia do të përballet me Danimarkën në gjysmëfinalet e Euro 2020, dhe megjithëse “3 Luanët” vijnë në këtë takim si favoritë, trajneri Southgate e di mjaft mirë rrezikun që përbëjnë danezët. Numri 1 i pankinës angleze e ka cilësuar si “një valë të fuqishme emocionesh” atë me të cilën do të përballen lojtarët e tij në Wembley ditën e mërkurë.

Që prej incidentit të ndodhur me Christian Eriksen, Danimarka është parë akoma dhe më e motivuar për të përsëritur suksesin e vitit 1992 në Europian. Kjo do të ishte dhurata perfekte për kapitenin e tyre, i cili nuk mund të jetë i pranishëm në fushën e blertë. Southgate e di mirë se kjo është një nxitje mjaft e fortë psikologjike. Trajneri anglez është shprehur:

“Të gjithë flasim për gjëra që kemi kaluar, por ajo që kaloi ekipi danez atë ditë, të shihje kapitenin e skuadrës në atë gjendje… Ajo që ndodhi ishte e fuqishme. E gjitha përbën një valë të madhe emocionesh, e cila do të vijë fuqishëm në Wembley.”

Gjithsesi, Southgate u tregua i shpejtë për të vlerësuar ekipin e tij:

“Une e di se lojtarët e mi janë në formën e tyre më të mirë kur janë të qetë. Është kyç për përgatitjen tonë që të largojmë vëmendjen nga zhurma e ndeshjeve të kaluara.

Lojtarët kanë mentalitetin e duhur për të vazhduar më tej. Atyre u pëlqen kjo sfidë. Sigurisht, në kompeticione të tilla ndeshja mund të marrë një rrjedhë të papritur. Por ata ( lojtarët ) do të jenë të përgatitur për këtë gjë. Kemi futbollistë që kanë fituar trofe, dhe e dinë se çfarë duhet.”

Anglia do të kërkojë kështu të thyejë mallkimin e eleminimit në gjysmëfinale, duke i shkuar deri në fund Euro 2020, dhe duke rikthyer futbollin në shtëpi.