Në vazhdën e kritikave të vazhdueshme për performancën e tij në Euro 2020, Harry Kane ka nënvizuar dhe një herë vlerat e tij për kombëtaren angleze. 27 vjeçari sugjeroi se është ende një nga “sulmuesit më të mirë” të kompeticionit. Kjo, pavarësisht se bomberi nuk ka arritur të shënojë asnjë gol në 2 paraqitjet e tij të para në Europian. Gjatë një konference për shtyp, lojtari deklaroi për mediat:
“Besoj te vetja. Gjithmonë kam besim te vetja. Është mënyra e vetme dhe më e mirë për t’i bërë gjërat. Kur je një sulmues nuk shënon për disa lojëra, më pas shënon 1 ose 2 gola dhe gjithçka kthehet përsëri në favorin tënd. Gjërat ndryshojnë shumë shpejt prandaj nuk është koha për të menduar shumë. Duhet të përqëndrohemi.”
Kane gjithashtu shtoi:
“E di se çfarë jam në gjendje të bëj dhe çfarë mund t’i sjell skuadrës.
Nëse shënoj disa gola përballë Republikës Çeke ditën e martë të gjithë do të fillojnë të flasin përsëri për Këpucën e Artë. Gjithçka ka të bëjë me menaxhimin e pritshmërive por lojtarët dhe trajneri e dinë se çfarë i sjell unë skuadrës. Ka ndodhur në shumë raste që kam luajtur 2 ndeshje rradhazi pa shënuar gol, por në kompeticione të tilla vihet më shumë në dukje.”
Që prej mbylljes së sezonit sulmuesi ka qenë në qëndër të zhvillimeve sportive, për një transferim të mundshëm drejt Manchester United, Chelsea, Manchester City apo dhe Paris Saint-Germain. Gjithsesi, presidenti i Tottenham, Daniel Levy thuhet se nuk ka ndërmend të heqë dorë nga ky aset mjaft i çmuar për klubin e tij.
Pavarësisht kësaj, tashmë dihet zyrtarisht se sulmuesi njoftoi klubin për dëshirën e tij për t’u larguar, që përpara startit të Europianit. Çështja e transferimit të tij mbetet ende e hapur, por ashtu si Kane tha dhe vet, tani është koha për t’u përqëndruar te Euro 2020.
