Tashmë është zyrtare, gjigandi suedez i Milan, Zlatan Ibrahimovic, nuk do të jetë pjesë e kombëtares suedeze në Euro 2020. Shkak është bërë një dëmtim në gju, i marrë gjatë sfidës së Milan me Juventus, të cilën kuqezinjtë e fituan me rezultatin spektakolar 3-0. Që në momentin kur Ibrahimovic la fushën u pa qartë se dëmtimi ishte serioz, dhe më vonë kjo gjë u konfirmua dhe nga vet mjekët e Milan. Sipas deklaratës zyrtare të klubit, dëmtimi kërkon trajtim për të paktën 6 javë. Kjo do të thotë se mundësitë e Ibras për të ndihmuar Suedinë në Europian janë gati zero.
Trajneri i kombëtares suedeze, Janne Andersson, komentoi mbi dëmtimin e sulmuesit:
“Kam folur me Zlatan Ibrahimovic i cili fatkeqësisht më ka thënë se ky dëmtim, do të ndalojë pjesëmarrjen e tij në Europianin e kësaj vere. Sigurisht që kjo të bën të ndihesh keq, fillimisht për vet Zlatan, por dhe për ne.”
Kujtojmë se legjenda 39 vjeçare u rikthye pranë kombëtares në muajin mars, pas një pause 5 vjeçare, që prej largimit të tij të parë nga kombëtarja. Mungesa e tij është padyshim një humbje e madhe për kombëtaren, e cila do të duhet të zbresë në fushë pa një lojtar me eksperiencë europiane si Ibrahimovic.
Suedia do të startojë fushatën e saj në Euro 2020 me një super-sfidë përballë Spanjës në Seville, në datë 14 qershor. Më pas, të besuarit e Janne Andersson do të përballen pas 4 ditësh me Sllovakinë. Në fund, Suedinë e pret një tjetër përballje e vështirë me Poloninë në Saint-Petersburg në datë 23 qershor. Duke marrë parasysh se rikuperimi i Zlatan, në rastin më të mirë mund të mbyllet në 26 qershor, i vetmi shans që suedezi të aktivizohet në Europian është nëse Suedia arrin të kalojë grupin E. Megjithatë, edhe ky skenar duket i largët.
