Një lajm i befasishëm por që do të bëjë të lumtur shumë fansa nëse është i vërtetë po qarkullon në portalet sportive europiane. Bëhet fjalë për rikthimin e bujshëm të Zlatan Ibrahimovic me kombëtaren suedeze për ndeshjet finale të Euro 2020.
39 vjeçari është golashënuesi më i mirë i të gjitha kohërave për Suedinë, me 62 gola. Gjithsesi Zlatan nuk është aktivizuar me kombëtaren që prej europianit të vitit 2016. Pra, çfarë ndryshoi?
Si fillim, suedezi po kalon një sezon fantastik me Milan në Itali. Ibrahimovic ka shënuar deri më tani 14 gola për kuqezinjtë në Serie A, duke ndihmuar kështu skuadrën e tij në rrugën drejt titullit kampion. Kjo duket arsyeja kryesore, por një tjetër faktor mund të jenë dhe rrethanat e jashtëzakonshme të zhvillimit të Euro 2020 këtë vit. Kombëtare të tjera përveç Suedisë i kanë pasur sytë tek veteranët e tyre, duke shpresuar se eksperienca e gjatë dhe pjekuria në fushë mund të shërbejnë vërtet shumë, sidomos në këtë edicion të Euro 2020.
Sipas raportimeve të FotbollDirekt, Zlatan do të thirret nga kombëtarja për ndeshjet kualifikuese të Kupës së Botës përballë Gjeorgjisë dhe Kosovës. Gjigandi suedez do të jetë me shumë mundësi i gatshëm dhe për sfidën miqësore ndaj Estonisë. Duke parë dhe faktorët e tjerë dhe kompozimin e ekipit suedez, në qoftë se Ibrahimovic rikthehet për Euro 2020, me shumë mundësi ai do të jetë udhëheqësi i ekipit në qendër të sulmit.
Gjithsesi, problemi kryesor për sulmuesin e Milan në këto momente është dëmtimi i cili e ka lënë jashtë fushe. Gjasat janë që Zlatan të humbasë përballjen me Manchester United në Europa League, që ç’është e vërteta është mjaft e rëndësishme për italianët. Ndeshja e parë do të zhvillohet në Old Trafford në 11 mars ndërsa takimi i kthimit është planifikuar në datën 18 mars, një javë më vonë në Itali.