Franca e drejtuar nga Didier Deschamps është padyshim një nga kombëtaret favorite për të ngritur lart trofeun e Euro 2020. Këtë gjë, sigurisht e di dhe vet numri 1 i pankinës së “Gjelave”. Por ky fakt, nuk do të thotë se Deschamps nuk ka dilema në përzgjedhjen e formacionit perfekt për kompeticionin prestigjoz. Megjithëse trajneri publikoi listën zyrtare të futbollistëve të grumbulluar, modeli i lojës dhe lista e titullarëve mbetet e paqartë.
Skuadrës së mbushur plot me yje, i është shtuar tashmë dhe Karim Benzema, pas një mungese plot 6 vjeçare në kombëtare. Sulmuesi i Real Madrid është një tjetër vlerë e shtuar për francezët, dhe pritet të drejtojë sulmin, i mbështetur nga Antoine Griezmann dhe Kylian Mbappe. Por, ky plan duket se nxjerr komplet jashtë loje Olivier Giroud. Sulmuesi luan në të njejtin pozicion si Benzema, por Franca e mbushur plot me yje ka vend vetëm për njerin prej tyre si titullar. Për të mos përmendur dhe emrat e Kingsley Coman dhe Ousmane Dembele, të cilët mund të aktivizohen vetëm në rast dëmtimi të njërit prej anësorëve titullarë.
Deschamps mund të zgjedhë të luajë dhe me formacione të ndryshme në Europian, por ky skenar krijon një ekip më pak solid dhe të stabilizuar. Në mesfushë emri i Moussa Sissoko mbetet në dyshim për një vend në skuadrën e parë, por kjo dilemë do të zgjidhet vetëm me startin e kompeticionit.
Në mbrojtje situata duket më e qartë, me titullarët kryesorë: Raphael Varane, Presnel Kimpembe, Benjamin Pavard dhe Lucas Hernandez. Të 4 lojtarët morën pjesë në ndeshjen e fundit të Francës me Bosnie Herzegovinën, dhe duket se ky lloj modeli difensiv mund të jetë i aplikueshëm dhe në Euro 2020. Lucas Digne gjithashtu ngelet një opsion i fortë, i cili mund të zëvëndësojë 1 prej titullarëve në mbrojtje.
Sipas të gjitha gjasave, porta do t’i besohet përsëri veteranit Hugo Lloris. Gjithsesi dëmtimet e këtij të fundit gjatë sezonit mund të sjellin të papritura. Në këtë rast, Steve Mandanda do të jetë gardiani i portës së “gjelave”.
