Mesfushori i Manchester City, Kevin De Bruyne, pësoi një dëmtim në ndeshjen mjaft të luftuar mes Belgjikës dhe Portugalisë, e cila u mbyll me kualifikimin e belgëve. Pas një dyluftimi me Joao Palhinha të Portugalisë, u pa qartë se mesfushori i talentuar mori një goditje të forte. Pavarësisht kësaj, De Bruyne tentoi të vazhdonte lojën, por u detyrua të largohej vetëm 2 minuta pas nisjes së pjesës së dytë.
Gjatë pjesës së dytë lojtari u pa i ulur në stol, me një kompresë të madhe akulli që mbulonte këmbën e tij. Interesi ishte i madh nga mediat sportive dhe trajneri i Belgjikës, Roberto Martinez sqaroi situatën në lidhje me dëmtimin e yllit të City:
“Do të na duhen të paktën 48 orë për të konfirmuar shkallën e dëmtimit. Ishte një faull shumë i keq. Ende nuk kemi një diagnozë nga departamenti mjekësor.”
Në kampin belg një tjetër shqetësim është dhe gjendja e Eden Hazard i cili duket se pësoi një tërhqeje muskulare në momentet e fundit të ndeshjes. Portieri Thibault Courtois u ka komunikuar disa reporterëve se sipas tij, Europiani ishte mbyllur për Hazard pas dëmtimit. Nëse ky lajm konfirmohet, do të jetë një humbje mjaft e madhe për ekipin belg, sidomos në këtë fazë të Euro 2020 ku diferencën e bëjnë talentet individuale. Trajneri Martinez komunikoi të njejtin mesazh dhe për dëmtimin e Hazard, duke thënë se duhet të presim raportet mjekësore, por kemi të bëjmë me një problem muskular.
Belgjika do të përballet me Italinë në raundin e çerekfinaleve, në një sfidë mjaft të vështirë ditën e premte. Kjo do të thotë se koha është armiku i momentit në kampin belg. De Bruyne dhe Hazard kanë vetëm 4 ditë kohë për t’u rikuperuar, dhe edhe në qoftë se ia dalin, mbetet për t’u parë forma dhe performanca fizike në fushë.
