Ish-mbrojtësi i Manchester United, Gary Neville, mendon se Franca është skuadra “për t’u mundur” në Euro 2020. Neville, i cili tashmë mban rolin e analistit sportive, beson fort tek forca fizike dhe mentaliteti i ekipit të Didier Deschamps. Gjithashtu, ish-futbollisti u vlerësoi në mënyrë të veçantë shpejtësinë dhe inteligjencën e lojtarëve francezë.
Gary Neville u shpreh për Sky Sports:
“Nuk shikoj ekip tjetër përveç Francës (favorit për të fituar Euro 2020), thjesht nuk mundem.
Eksperienca, mentaliteti fitues, personalitetet e lojtarëve, shpejtësia, zgjuarsia… janë të gjitha të pranishme në çdo ndeshje të skuadrës franceze. Ata mund të luajnë përballë çdo ekipi, janë një skuadër që adaptohen shpejt, prandaj nuk mendoj se do të shqetësohen se cili është kundërshtari i tyre.”
Franca e Didier Deschamps dështoi të ngrinte lart trofeun e Europianit në vitin 2016, duke u mposhtur me rezultatin minimal 1-0 nga Portugalia e Cristiano Ronaldos. Gjithsesi, “gjelat” u rikthyen fuqishëm në vitin 2018, duke fituar trofeun më prestigjoz të futbollit, pikërisht Kupën e Botës, në finale përballë Kroacisë.
Analisti sportiv nuk kishte sesi të mos komentonte, shancet e kombëtares angleze në Europian. Neville u shpreh:
“Do të duhej shumë fat, një përpjekje e jashtëzakonshme, si dhe një Wemley Stadium i mbushur plot e përplot me fansa anglezë, që gjërat të shkojnë në favorin e tyre (Anglisë). Nuk mendoj se triumfi i Anglisë do të ishte një surprizë. Pas arritjes së gjysmëfinaleve në Kupën e Botës para 3 vitesh, tani janë krijuar pritshmëri.”
Gary Neville gjithashtu komentoi mbi ndeshjen e parë të kombëtares angleze në Euro 2020, përballë Kroacisë së Luka Modric. Ish mbrojtësi vlerësoi aftësitë e mesfushorit të Real Madrid, duke u shprehur se Modric është nga ata lojtarë, të aftë për të ndryshuar rrjedhën e lojës. Sipas tij, mesfushori kroat përbën rrezik të madh për Anglinë, dhe duhet të stopohet me çdo kusht nga ekipi i Southgate.
