Në momentet që flasim, na ndan gati një muaj për startin e Europianit të futbollit. Pritshmëritë janë të larta, dhe fansat në mbarë botën mezi po presin fillimin e kompeticionit prestigjoz, i cili u shty me 1 vit për shkak të situatës së krijuar nga pandemia. Megjithatë, COVID është ende prezent, dhe kjo do të thotë se Europiani i këtij viti do të jetë disi ndryshe nga organizimet e kaluara.
Portali prestigjoz “The Times”, ka publikuar një listë me rregulla dhe ndryshime të mundshme, të cilat mund të jenë në fuqi gjatë zhvillimit të ndeshjeve. Këto rregulla parashikohen si masa për parandalimin e efekteve të pandemisë, por dhe për zhvillimin sa normalisht të kompeticionit.
Sipas raportimeve, flitet se tifozëve do t’u ndalohet konsumi i pijeve alkoolike dhe jo-alkoolike në stadium. Përveç kësaj, po mendohet ideja e këshillimit të fansave, që golat të mos i festojnë duke bërtitur, pasi kjo mund të ndikojë në përhapjen e virusit. Në pamje të parë duket qesharake, por kohëra të jashtëzakonshme kërkojnë masa të jashtëzakonshme.
Tifozët gjithashtu pritet të mbajnë maska në stadium, ndërsa përsa i përket distancimit social, miratimi është gati zyrtar. Gjithsesi rregullat nuk do të jenë kaq strikte, në qoftë se UEFA vendos që fansat duhet të paraqesin një tampon negativ përpara se të hyjnë në stadium. Por, kjo ide nuk është pritur mirë nga shumica e tifozëve dhe ndjekësve të sportit, të cilët e kanë konsideruar si diskriminuese në rrjetet sociale. Pavarësisht kësaj, ideja u vendos në provë në finalen e Carabao Cup, mes Manchester City dhe Tottenham Hotspur.
Mes të tjerash, në qytete të caktuara, tifozët mund të jenë të detyruar t’i nënshtrohen matjes së temperaturës trupore, para hyrjes në stadium. Shumë prej këtyre detajeve teknike mbeten në dorën e qeverive të shteteve organizatore. Për këtë arsye, parashikohet se protokollet e ndeshjeve mund të jenë të ndryshme nga një stadium te tjetri.