UEFA ka dhënë dritën jeshile të aprovimit për një rregull mjaft të rëndësishëm, të vlefshëm për ndeshjet e Europianit të këtij viti. Në çdo ndeshje të Euro 2020, do të lejohen deri në 5 zëvëndësime për secilën skuadër. Autoriteti më i lartë i futbollit europian u shpreh se vendimi erdhi pasi ky rregull, është tashmë i pranishëm dhe në kualifikueset për Botërorin 2022. UEFA shtoi se rregulli do të jetë i vlefshëm dhe për Nations League, e cila do të zhvillohet gjatë muajit tetor të këtij viti.
Një tjetër arsyetim mbështetës, është dhe fakti se ndeshjet e Euro 2020 do të zhvillohen sipas axhendave që janë relativisht mjaft të lodhshme, dhe nuk u lënë shumë kohë lojtarëve për t’u rikuperuar. Pandemia e COVID vendosi në pozitë mjaft të vështirë institucionet e futbollit në mbarë botën, të cilat u detyruan të mendojnë për zgjidhje alternative pas anullimit të kompeticionit.
Rregulli i 5 zëvëndësimeve është implementuar prej disa kohësh tashmë, dhe në Champions League dhe Europa League.
Ndërkohë përsa i përket pjesëmarrjes së fansave në kompeticion, lajmet e fundit kanë qenë pozitive. Zyrtarë të UEFA kanë bërë me dije se do të mbështeten tek testet PCR, për të vendosur mbi kapacitetin në stadiume të caktuara. Gjithashtu qeveria europiane e futbollit tërhoqi vendimin e saj të fundit për shifrën prej jo më shumë se 30% pjesëmarrje në stadiume. Kështu, shtetet organizatore e kanë në dorën e tyre të lirë vendimin për këtë çështje.
Por, UEFA ende la në fuqi vendimin e saj për të mos lejuar në stadiume, fansat e huaj pra të skuadrës mike. Kjo ishte deri diku e justifikuar duke marrë parasysh kufizimet në lëvizje që kanë vendosur shumë shtete europiane për shkak të pandemisë. Megjithatë, edhe ky vendim pritet të rishikohet për fazën finale të kompeticionit.
