Trajneri i kombëtares italiane, Roberto Mancini, ka publikuar listën paraprake të lojtarëve, që do të jenë pjesë e Italisë në Europianin e kësaj vere. Lista prej 33 lojtarësh është ende provizore, pra jo zyrtare. Megjithatë, nuk pritet të ketë dilema apo ndryshime të mëdha në momentin e zyrtarizimit. Mes të përzgjedhurëve, nuk kishte si të mungonin dhe lojtarët e Juventus.
Kombëtarja italiane mbështetet tashmë prej vitesh të kualiteti dhe eksperienca e lojtarëve të “Zonjës së Vjetër”, dhe Euro 2020 nuk bën përjashtim. Duke qenë se Serie A do të mbyllë sezonin e saj shumë shpejt, energjia e lojtarëve do të jetë tashmë 100% e përqëndruar te kompeticioni prestigjoz.
Emrat kryesorë nga Juventus që pritet të jenë pjesë e “Gli Azzurri” janë: Giorgio Chiellini, partneri i tij Leonardo Bonucci, Federico Chiesa si dhe Federico Bernardeschi. Në qoftë se mund të përmblidhet me 1 përshkrim të shkurtër, kjo zgjedhje përfaqëson një kombinim perfekt mes eksperiencës dhe freskisë së talenteve të reja. Kombinime të tilla janë ato që kanë rezultuar dhe më të suksesshmet në historinë e Europianeve apo Botëroreve.
Nga emrat e përmendur më sipër, të gjithë e kanë gati 100% të sigurtë vendin e tyre në kombëtare. Përveç Bernardeschi, i cili mund të jetë në dyshim për shkak dëmtimi. Ish-anësori i Fiorentinës, dhe tashmë i Juventus është një lojtar që i është përshtatur mjaft mirë stilit të lojës së italianëve. Megjithatë, një sezon i lodhshëm me Juventus mund t’i kushtojë atij vendin në përfaqësuese.
Eventualisht, trajneri Mancini duhet të përzgjedhë vetëm 26 emra për listën zyrtare të kompeticionit, megjithatë, në kampin italian duket se nuk ka shumë dilema. Skuadra do të luajë një ndeshje miqësore përballë San Marinos në datë 28 maj. Sfida do të shërbejë jo vetëm si test, por mund të na tregojë dhe formacionin e mundshëm me të cilin Italia, mund të rreshtohet dhe në Euro 2020.