Portieri i talentuar i Everton, Jordan Pickford, është tejet i shqetësuar për faktin se mund të humbasë ndeshjet e Europianit të këtij viti. Kjo, për shkak të disa shqetësimeve në stomak të cilat e kanë lënë atë jashtë fushës së blertë.
Në 3 ndeshjet e vlefshme për Botërorin 2022 që Anglia zhvilloi në këtë periudhë, ishte Nick Pope, portieri i Burnley i cili mbrojti portën e “3 Luanëve”. Në kohën kur Pickford ishte ende i disponueshëm ai ishte gjithmonë zgjedhja e parë për Gareth Southgate.
Por tani, gjërat mund të ndryshojnë. Sipas burimeve në mediat angleze, trajneri i Anglisë nuk ka në plan të marrë me vete në Euro 2020, lojtarë në gjendje fizike jo optimale. Në këto rrethana, porterit të Everton i mbetet të shpresojë që të mos bëjë pjesë në këtë kategori.
Megjithatë, 27 vjeçari nuk ka marrë pjesë në seancën e fundit stërvitore me klubin e tij në Goodison Park. Dëmtimi në fjalë nuk ishte i pari për këtë sezon i Jordan Pickford. Problemet kanë qënë konstante, duke ndikuar drejtpërdrejt në paraqitjet e portierit të cilat kanë patur shumë ulje-ngritje. Performanca e tij e fundit me Everton ishte ajo ndaj Burnley, ku ekipi i tij humbi në shifrat 2-1 dhe Pickford u zëvëndësua gjatë lojës.
Edhe në qoftë se portieri ia del të rikuperojë energjitë e tij, ekziston një tjetër problem që mund t’i kushtojë atij Europianin e këtij viti. Pikërisht Nick Pope. Zëvëndësuesi i Pickford ka impresionuar me paraqitjet e tij, duke treguar një shkallë të lartë vetëbesimi dhe atletizimi në përballjet si titullar me Anglinë.
Pavarësisht disa kritikave në ndeshjen me Poloninë, Gareth Southgate nuk ka shumë opsione përsa i përket portës, dhe është i detyruar të bëjë një zgjedhje. Duke qenë se situata është ende e paqartë, mund të presim surpriza të momentit të fundit.