Zyrtarë të federatës italiane të futbollit kanë bërë me dije së fundmi një lajm interesant. Futbollistët nga kombëtarja italiane kanë marrë dozën e parë të vaksinës anti-covid, si pjesë e masave për zhvillimin në rrugën e duhur të Euro 2020. Ministria e Shëndetësisë ka bërë me dije se ka autorizuar një urdhër, ku i jep prioritet vaksinimit të “Azurëve”, tani që jemi shumë pranë fillimit të Europianit.
Federata vendase e futbollit u shpreh nëpërmjet presidentit të saj Gabriele Gravina:
“Sot 12 atletë u vaksinuan në Romë dhe 14 ose 15 të tjerë në Milano.
Gabriele Gravina
Ky ishte numri që na u bë me dije nga Mancini (trajneri i përfaqësueses), dhe më vonë, do të dorëzojmë tek UEFA, listën zyrtare të lojtarëve të grumbulluar për kompeticionin.”
Kombëtarja italiane ka një avantazh të madh pasi do të luajë të treja përballjet e fazës në grupe në Romë. Gjithashtu, dhe një çerekfinale, nëse ia dalin të kualifikohen. Skuadra e drejtuar nga Mancini do të ndeshet me Turqinë, Zvicrën dhe Uellsin, të cilët megjithëse nuk janë kundërshtarët më të fortë, dinë të surprizojnë.
Ndërkohë, UEFA ka bërë me dije rregulla të reja për kombëtaret që do të preken nga covid-i gjatë zhvillimit të ndeshjeve. Organi më i lartë europian i futbollit u shpreh se skuadrat që preken nga virusi mund të shtyjnë ndeshjet e tyre deri në 48 orë. Ky afat u lihet ekipeve për t’u dhënë mundësinë të gjejnë lojtarë të rinj. Rregulli do të vihet në zbatim në rastin kur ekipet kanë më pak se minimumi i kërkuar i lojtarëve të gatshëm, që është 13. Ndërsa kombëtaret që pavarësisht kësaj, përsëri nuk do të jenë në gjendje të zhvillojnë takimin, do të humbasin në tavolinë me rezultatin 3-0. UEFA gjithashtu ka parashikuar sanksione për federatat që mund të përfshihen në këtë skenar.
Rregullat e reja janë të ngjashme me ato që qeveria europiane e futbollit, vendosi në kompeticionet e klubeve si Champions League dhe Europa League gjatë këtij viti.