Gjendja fizike e Harry Maguire dhe Marcus Rashford duket se janë kthyer në një dhimbje koke për trajnerin e përfaqësueses angleze, Gareth Southgate.
Harry Maguire është në një garë me kohën, për të qenë i disponueshëm në ndeshjen e parë të Anglisë në Europian, pikërisht asaj përballë Kroacisë. Mbrojtësi i Manchester United është një nga pikat më të rëndësishme të formacionit të Southgate. Për këtë arsye, mungesa e tij do të prishte shumë ekuilibra në repartin difensiv të “3 Luanëve”.
Maguire ishte shprehur mjaft konfident se do të kapërcente dëmtimin, në kohën e duhur për të luajtur në finalen e Europa League. Por, faktet tregojnë se lojtarit i duhet kohë për t’u rikuperuar nga dëmtimi që mori në date 9 maj gjatë ndeshjes kundër Aston Villa. Ky telash por dhe probleme të tjera, ishin arsyeja se pse Gareth Southgate përfshiu plot 12 mbrojtës në listën provizore të lojtarëve të grumbulluar për Euro 2020.
Ndërkohë, një tjetër shqetësim i numrit 1 të pankinës së “3 Luanëve” është dhe Marcus Rashford. Talenti i United, në ndryshim nga shoku i tij i skuadrës Maguire, nuk po vuan ndonjë dëmtim fizik, përveç disa shqetësimeve të vogla në shpatull.. Por, sulmuesi i ri duket mjaft i lodhur nga një sezon i gjatë në Premier League. Rashford luajti rol kryesor në rrugëtimin e United në finalen e Europa League, si dhe në paraqitjen e mirë të “Djajëve të Kuq” në kampionat. Gjithsesi, entuziasmi dhe forca fizike e tij nuk kanë qenë në kalibrin e duhur së fundmi.
Në një kompeticion dinamik, të ngjeshur me ndeshje, dhe shumë të lodhshëm e të luftuar, Southgate ka të drejtë të shqetësohet për formën e sulmuesit të tij. Duke thënë këto, 11-shja e titullarëve në kombëtaren angleze ende mbetet një dilemë, deri në startin e Euro 2020.
