Pas shumë peripecive, lajmeve dhe raportimeve, më në fund ka një vendim zyrtar se çfarë do të ndodhë me Van Dijk në Euro 2020. Mbrojtësi i Liverpool ka bërë të ditur personalisht, se nuk do të jetë pjesë e kompeticionit madhor në verë. Lajmi u konfirmua zyrtarisht në një intervistë që shtatëlarti i mbrojtjes së “The Reds”, dha për klubin e tij. Mes të tjerash Virgil u shpreh:
“Kam arritur të marr një vendim nëse do të aktivizohem apo jo në Euro 2020.
Mendoj se fizikisht është zgjedhja e duhur që të mos luaj në Europian, dhe të shpenzoj kohën e pushimeve për t’u rikuperuar.”
Van Dijk e pranoi se ishte një vendim mjaft i vështirë për t’u marrë. Gjithsesi, mbrojtësi deklaroi se nuk donte që të rrezikonte të gjithë procesin e rikuperimit, duke u bërë pjesë e “Tulipanëve” në Europian. Sidomos kur fushata e kualifikueseve për Botërorin 2022 është relativisht afër. Lojtari gjithashtu shtoi:
“Sigurisht jam i zhgënjyer që do të humbas Europianin, dhe nuk do të kem mundësi të udhëheq skuadrën time. Por kjo është situata dhe më duhet ta pranoj, të gjithë duhet ta pranojnë. Mendoj që vendimi për të mos u aktivizuar është i duhuri në planin afatgjatë, dhe për këtë arsye jam në paqe me zgjedhjen e bërë. Mjekët janë shumë të kënaqur me rezultatet deri tani, dhe lajmi pozitiv është se nuk kam pasur ndalesë apo moment të vështirë. Shpresojmë që kjo të mos ndodhë.”
Virgil u shpreh se periudha jashtë fushave ka qenë mjaft e vështirë për të. Hollandezi ndihet mirënjohës ndaj familjes së tij, trajnerit Klopp si dhe gjithë stafit mjekësor, që sipas tij, i kanë ofruar vazhdimisht suportin e tyre. Van Dijk ka thënë se e ka kaluar pjesën më të vështirë, dhe po kalon një moment të mirë duke bërë progress të shpejtë.