Zvicra është një nga përfaqësueset më interesante të Europianit, që pritet të zhvillohet në muajt e verës. Skuadra e drejtuar nga Vladimir Petkovic, pritet të bëjë publike së shpejti, listën finale të 26 lojtarëve që do të marrin pjesë në kompeticionin prestigjoz. Por çfarë dimë momentalisht për përfaqësuesen zviceriane?
Kombëtarja drejtohet nga 57 vjeçari Vladimir Petkovic që prej vitit 2014. Më përpara Petkovic ka drejtuar Young Boys dhe Lazio, ku me këta të fundit arriti të fitojë dhe Coppa Italia në vitin 2013. Ky është trofeu i vetëm madhor që trajneri me origjinë boshnjake ka fituar. Megjithatë, rezultatet e punës së tij me Zvicrën kanë qenë përgjithësisht pozitive.
Superstari i përfaqësueses është padyshim Granit Xhaka. Lojtari i Arsenalit mban rolin e kapitenit në ekip, duke qenë një nga lojtarët me më shumë eksperiencë në kombëtare. Por Zvicrës nuk i mungojnë yjet. Xherdan Shaqiri i Liverpool dhe Remo Freuler i Atalantës janë vetëm 2 nga pikat e forta të skuadrës. Emra të tjerë që pritet të kenë mjaft peshë në ndeshjet e Euro 2020 janë Breel Embolo, Yann Sommer, dhe lojtari i Dortmund, Manuel Akanji.
Kombëtarja zviceriane ka marrë pjesë në finalet e vetëm 4 Europianeve. Paraqitja e parë ishte ajo e vitit 1996 ku skuadra nuk ia doli të kalonte grupin. Në dy paraqitjet e tjera, përkatësisht në vitet 2004 dhe 2008 fati i Zvicrës ishte po i njejtë, duke u eleminuar që në fazën e grupeve.
Por Europiani i vitit 2016 në Portugali rezervoi një skenar tjetër për ekipin. Zvicerianët ia dolën të shkonin deri në raundin e 1/16, ku u eleminuan më pas me penallti nga Polonia. Duke u nisur nga paraqitjet në rritje, Petkovic nuk pritet të sjellë lojtarë të rinj në skuadër këtë Europian. Me një skuadër me talente, por dhe lojtarë me eksperiencë, Zvicra mund të avancojë përtej pritshmërive në Euro 2020.
