Cristiano Ronaldo arriti të shënojë 2 gola përballë Francës, në një barazim emocionues që i siguroi Portugalisë, kalimin në fazën tjetër. Por, ky nuk ishte suksesi i vetëm i mbrëmjes për portugezin. CR7 barazoi rekordin për më shumë gola në arenën ndërkombëtare, plot 109, po aq sa Ali Daei i kombëtares së Iranit.
Sulmuesi i Juventus ishte si gjithmonë mjaft i saktë nga pika e bardhë, duke kthyer në gol 2 penallti të marra gjatë takimit. 36 vjeçari mund të thyejë kështu shumë lehtë rekordin, duke qenë se i duhet vetëm 1 gol tjetër me Portugalinë. Momentalisht Ronaldo mban dhe titullin e golashënuesit më të mirë të kompeticionit, me 5 gola në 3 ndeshje. Gjithsej në Europiane, sulmuesi ka shënuar 14 gola, 5 më shumë se legjenda franceze Michel Platini. Goli i parë i CR7 në një Europian futbolli erdhi në vitin 2004, në humbjen që Portugalia pësoi ndaj Greqisë në shifrat 2-1.
Takimi mes Francës dhe Portugalisë ishte mjaft special dhe për Karim Benzema. Francezi shënoi golin e parë për “gjelat”, që prej vitit 2015, kur u detyrua të lihej jashtë grumbullimit me kombëtaren për shkak të një skandali. Sulmuesi veteran i Real Madrid u shpreh për TF1 pas takimit:
“Asnjëherë nuk i kam vënë në dyshim aftësitë e mia. Por, e dija se kishte pritshmëri për mua nga tifozët. Arrita të shënoja dhe do ta festoj këtë moment me të gjithë.”
Ndërkohë grupi F, ose ndryshe i ashtuquajturi “grupi i ferrit” u mbyll ashtu siç dëshironin të gjithë fansat e futbollit. Franca, Gjermania dhe Portugalia u kualifikuan të gjitha në fazën e ardhshme, duke na premtuar akoma më shumë spektakël dhe emocion në përballjet direkte. Portugalia do të përballet ditën e diel me Belgjikën, ndërsa Franca do të sfidojë Zvicrën e Xherdan Shaqirit.