Harry Kane ka qenë një nga emrat që është etiketuar vazhdimisht nga opinioni sportiv, si protagonisti i mundshëm i Euro 2020. Megjithatë, duket se sulmuesi nuk është përshtatur siç duhet në 11-shen e Gareth Southgate. Kane dështoi të përbënte rrezik për Kroacinë, në ndeshjen hapëse të Europianit për Anglinë. Ndërsa në ndeshjen e dytë përballë Skocisë, pamja ishte pak a shumë e njejtë dhe sulmuesi u zëvëndësua nga Southgate në pjesën e dytë të takimit.
Roy Keane ka teorinë e tij se përse Kane ka dështuar të gjejë formën optimale në 2 ndeshjet e para të Euro 2020. Sipas analistit, bomberi i përfaqësueses angleze është shpërqëndruar nga thashethemet e fundit mbi merkaton, dhe një largim të mundshëm të tij nga Tottenham. Ish-lojtari i Manchester United u shpreh për ITV:
“Përpara kompeticionit (Euro 2020) qarkullonin thashetheme se ai (Harry Kane) do të largohej nga Spurs-at. Mbase është shpërqëndruar nga kjo…Nëse Kane ka qënë në diskutime me klube të tjera kjo nuk e ndihmon atë të përqëndrohet.”
Ndërkohë, analisti Graeme Souness ka një shpjegim tjetër për situatën. Sipas tij, lodhja është faktori që mund të jetë përgjegjës për formën jashtë pritshmërive të Kane. Skocezi u shpreh:
“Ai duket si një hije e lojtarit që ne njohim. I mungon entuziazmi. Kane nuk po merr as shërbimin më të mirë nga mesfusha angleze, e cila nuk po funksionon, por gjithsesi ai duket i lodhur. Po flasim për lojtarin që mund të përfshihet në një transferim të madh këtë verë, duhet të zgjohet.”
Manchester City, Manchester United dhe Chelsea janë 3 klube të cilat janë ende në garë për të përfituar shërbimet e sulmuesit. Ndërkohë, ka zëra që flasin dhe për një transferim të mundshëm të tij në Spanjë. Megjithatë, shumë gjëra do të varen nga forma që Kane do të shfaqë në vazhdim të ndeshjeve të Europianit.