Një lajm mjaft i bujshëm që vjen nga kombëtarja spanjolle, është bërë i ditur vetëm pak çaste më parë nga mediat sportive në vendin iberik. Sergio Ramos, kapiteni i Real Madrid është lënë jashtë listës së lojtarëve të kampit spanjoll, për Euro 2020.
35 vjeçari ka zhvilluar një sezon të vështirë, me disa dëmtime të ndryshme përgjatë vitit. Pikërisht këto dëmtime u bënë shkak që Ramos të startonte në vetëm 15 përballje të La Liga gjatë këtij sezoni. Megjithatë, përjashtimi i tij nga kompeticioni prestigjoz mbetet një surprizë. Sidomos duke marrë parasysh faktin se mbrojtësi ka zhvilluar plot 180 paraqitje me kombëtaren spanjolle, duke fituar Kupën e Botës si dhe 2 Europiane. Mungesa e veteranit nënkupton se do të jetë hera e parë që Spanja do të luajë në një kompeticion madhor, pa asnjë lojtar të Real Madrid në organikën e vet.
Por si erdhi vendimi? Luis Enrique, trajneri i përfaqësueses, u shpreh se biseda e tij me Ramos ngelet private dhe nuk do të bëjë publike asnjë detaj në lidhje me të. Gjithsesi, numri 1 i pankinës spanjolle u detyrua të jepte një sqarim për mediat:
“Nuk ishte e lehtë t’i komunikoja atij (Ramos) diçka që nuk ishte pozitive për të. Por, duhet të ndërmarr vendime që unë dhe stafi im i konsiderojmë si më të mirat për ekipin.”
Enrique vendosi t’i besojë qendrën e mbrojtjes, Pau Torres, Eric Garcias dhe Diego Llorentes. Vendimi i trajnerit do të thotë se kësaj rradhe do të shohim një Spanjë më të re në moshë, ku freskia e talenteve të reja, do të kombinohet me eksperiencën e disa prej veteranëve si Sergio Busquets apo Jordi Alba. Ndërkohë David de Gea do të vazhdojë të mbrojë portën e spanjollëve, pavarësisht se së fundmi ka humbur vendin e titullarit me klubin e tij, Manchester United.
