Kualifikueset për Botërorin 2022 janë mbase testi më i mirë për kombëtaret, në prag të Euro 2020 që tashmë është vetëm pak javë larg. Por si u paraqitën skuadrat pretendente për trofeun në këto ndeshje? Anglia, Gjermania dhe Italia dëshmuan një formë mjaft bindëse, por nuk mund të themi të njejtën gjë për spanjollët e drejtuar nga Luis Enrique.
Kombëtarja spanjolle nuk arriti të shkonte më shumë se barazimi në shtëpi, përballë një skuadre relativisht modeste siç është Greqia. Të zotët e shtëpisë gjetën rrugën e rrjetës të parët, me Alvaro Moratën në minutën e 34’. Por grekët iu falën një penalltie të shndërruar në gol nga Tasos Bakasetas për të barazuar rezultatin, dhe takimi u mbyll në shifrat 1-1.
Anglia ndërkohë shkatërroi në shifrat 5-0 amatorët e San Marino, duke bërë kështu detyrën. Ky nuk mund të konsiderohet një test i vërtetë për “3 Luanët”, për shkak të kundërshtarit mjaft të dobët. Gjithsesi, ekipi i Southgate dëshmoi se i merr mjaft seriozisht gjërat, një shenjë e përkushtimit që pritet të shfaqet dhe në Euro 2020.
Gjermania mposhti Islandën me shifrat e pastra 3-0. Kombëtarja e Joachim Löw dukej mjaft konfidente dhe nuk pati asnjë moment të vështirë gjatë ndeshjes. Leon Goretzka, Kai Havertz dhe İlkay Gündoğan ishin autorët e golave për “Panzerat”.
Dhe Italia arriti një fitore të pastër në shifrat 2-0 përballë Irlandës së Veriut, në aktin e parë të këtyre kualifikueseve. Ishte Domenico Berardi që shënoi golin e parë, duke i dhënë avantazhin “Azurëve”. Përgjigja nga Irlanda e Veriut nuk erdhi asnjëherë, dhe Ciro Immobile shënoi golin e dytë përpara pushimit. Në pjesën e dytë Irlanda e Veriut tentoi disa herë të vinte në vështirësi italianët por pa krijuar asgjë konkrete.
Ndërkohë pak ditë më parë ishte Franca, që në ndeshjen e parë të këtyre kualifikueseve nuk shkoi më shumë se një barazim në shifrat 1-1 përballë Ukrainës. Mbetet të shohim nëse ekipet “big”, do të shfaqin të njejtat luhatje dhe gjatë Euro 2020 në verë.