Wayne Rooney beson se Franca e Didier Deschamps është favorite kryesore për të ngritur lart trofeun e Euro 2020. 35 vjeçari i cili është cilësuar si një nga sulmuesit më të mirë në historinë e Europianit, nuk ka denjuar të lërë mënjanë mbështetjen për Anglinë, duke u treguar i ftohtë në gjykimin e tij.
Legjenda e Manchester United u shpreh për prestigjozen “The Times”:
“Kylian Mbappe, N’Golo Kante, Karim Benzema, Antoine Griezmann, Paul Pogba, Raphael Varane, Hugo Lloris: kur shikon kualitetin e tyre, eksperiencën, dhe rekordin si kampionë bote, kupton se në qoftë se lojtarët janë në nivelin e duhur, ata (Franca) do të fitojnë kompeticionin. Pa asnjë problem. Ata nuk janë thjesht një koleksion me lojtarë të mire. Siç e pamë dhe në Rusi në 2018 Franca është një ekip i unifikuar, dhe uniteti forcohet akoma më shumë kur fiton trofe.”
Rooney, i cili tashmë është në krye të pankinës së Derby County, gjithashtu komentoi mbi shancet e Anglisë në Euro 2020:
“Anglia është pjesë e një grupi me 4 skuadra të cilat qëndrojnë më lart përsa i përket pritshmërive në Euro 2020. Portugalia dhe Belgjika janë po ashtu në atë nivel, por favoritët kryesorë për mua mbeten francezët.”
Wayne Rooney gjithashtu vlerësoi kualitetin e N’Golo Kante, duke e cilësuar atë si lojtarin më të mirë për lojën në grup. Anglezi u shpreh se Kante ka në të njejtën kohë, kualitetet e Yaya Toure dhe Claude Makelele. Sipas tij, mesfushori francez nëpërmjet energjisë së tij, është në gjendje të nxjerrë më të mirën dhe nga lojtarët e tjerë.
Për Rooney, çelësi i suksesit të francezëve është mentaliteti i grupit. 35 vjeçari u shpreh se e ka të pamundur të imagjinojë lojtarët e Didier Deschamps duke u munduar të jenë superstarët e kompeticionit. Ish sulmuesi i kombëtares angleze beson se Franca do të tregohet e kujdesshme, duke u munduar të fitojë ndeshjet njëra pas tjetrës, bazuar në forcën e skuadrës.