Lajme pozitive për të gjithë adhuruesit e futbollit! Sekretari i kulturës në Mbretërinë e Bashkuar, Oliver Dowden beson fort se një numër i madh fansash, mund të jenë të pranishëm në Wembly gjatë fazave më të vona të kompeticionit. Ky është një lajm fantastik, duke marrë parasysh se arena legjendare do të mirëpresë plot 7 ndeshje të Europianit, duke përfshirë këtu 2 gjysmëfinalet dhe finalen e madhe.
Duke filluar nga data 17 maj, sipas rregullave të qeverisë britanike, në stadiume mund të akomodohen deri në 10.000 fansa. Ky numër pritet të jetë më i madh, e deri në kapacitetin e plotë të stadiumit pas datës 21 qershor. Kjo pasi 21 qershori është data zyrtare e vendosur nga qeveria për heqjen e të gjitha masave anti-covid.
Oliver Dowden u shpreh për SkySport News:
“Për ndeshjet që vijnë më vonë në Euro 2020 mendoj se do të shikojmë shumë më shumë se 10,000 fansa në stadiume. Por, duhet të gjejmë një mënyrë të sigurtë për ta bërë këtë gjë. Kam shumë shpresë dhe jam optimist se do të shohim shumë më shumë persona në stadiume pas ndeshjeve të para.”
Ky skenar duket tashmë 100% i realizueshëm. Sidomos pas konfirmimit të minstrit të sporteve, Nigel Huddleston se kompeticionet e Wimbledon dhe Formula 1 do të zhvillohen me praninë e spektatorëve. Sipas raportimeve të fundit të BBC, specialistët kanë zhvilluar disa skenarë të mundshëm mbi numrin e fansave që mund të ulen në shkallët e Wembly. Nga të dhënat, mendohet se 20,000 vende është një target i arritshëm, për të cilin po punohet dhe nga ana e autoriteteve.
Momentalisht duket se gjërat janë në drejtimin e duhur, me federatat e tjera në Europë që po ndjekin të njejtën linjë, duke u shprehur mjaft optimiste për të ardhmen. Gjithsesi, çdo gjë do të varet nga ecuria e pandemisë, por procesi i vaksinimit në shtetet europiane, është një tjetër garanci shpresëdhënëse për organziuesit e turneut.
