Manchester United siguroi një tjetër fitore në vazhdën e rezultateve pozitive, kësaj rradhe 3-0 përballë Sheriff Tiraspol në Europa League. Cristiano Ronaldo u rikthye me gol në formacion, pas pezullimit në formë ndëshkimi nga trajneri Ten Hag. Portugezi shënoi golin e tretë për “Djajtë e Kuq” që ishte njëkohësisht i 701-ti në karrierën e jashtëzakonshme të CR7.
Ishte Diogo Dalot ai që zhbllokoi rezultatin, duke i dhënë avantazhin United në minutën e 44’ të takimit, pas një krosimi të bukur të Eriksen nga këndi. Pjesa e parë u mbyll në shifrat 1-0, ndërkohë që në të dytën anglezët shënuan një tjetër gol. Kësaj rradhe ishte Marcus Rashford, i cili hyri në fushë si zëvëndësues dhe shënoi në të 65’-ën, duke shfrytëzuar mjaft mirë një krosim të Luke Shaw. Ronaldo ndërkohë gjeti rrjetën vetëm 9 minuta para përfundimit të sfidës. Rikthimi i portugezit me gol u komentua dhe nga vet trajneri Ten Hag në intervistën pas ndeshjes. Tekniku hollandez tha:
“Ai (Ronaldo) vazhdoi të shtynte fort dhe skuadra vazhdoi t’i shërbente në pozicionin e duhur. Ai po përpiqej vazhdimisht të ishte në vendin e duhur, nuk u dorëzua dhe kjo është ajo që ka bërë gjatë gjithë karrierës së tij, dhe në fund është shpërblyer për të.”
Fitorja ishte mjaft e rëndësishme për United, por kjo nuk do të thotë se anglezët kanë siguruar vendin e parë në grupin E. “Djajtë e Kuq” do të ndeshen me Real Sociedad në Spanjë javën e ardhshme, dhe sfida do të përcaktojë fituesin e grupit. Anglezët duhet të fitojnë me të paktën 2 gola diferencë për të arritur objektivin. Vendi i dytë në grup ka shumë gjasa që në shortin e fazës me eleminim direkt të përballet me ekipe mjaft të forta si Barcelona, Juventus apo Atletico Madrid.
