Skuadra e Everton është shumë afër zyrtarizimit të marrëveshjeve me anësorin e Crystal Palace, Andros Townsend, dhe portierin e Bournemouth, Asmir Begovic.
Townsend pritet t’i bashkohet Everton me parametra zero, pasi kontrata e tij me Palace skadoi në qershor. 30 vjeçari pritet të ketë rol mjaft të rëndësishëm në ekipin e drejtuar tashmë nga Rafael Benitez. Kjo pasi Theo Walcott iu bashkua Southampton, duke lënë kështu Everton në kërkim të një sulmuesi për të mbushur hapësirat.
Townsend, i cili ka zhvilluar gjithsej 13 paraqitje me kombëtaren angleze gjithashtu është aktivizuar me Tottenham, QPR dhe Newcastle. Futbollisti iu bashkua Palace në vitin 2016, dhe sezonin e kaluar zhvilloi 36 paraqitje nën drejtimin e Roy Hodgson, duke shënuar vetëm 1 gol. Megjithatë, me lojën e tij, lojtari ndihmoi Crystal Palace për t’u renditur e 14-ta në Premier League sezoni e kaluar. Kapitulli i ri me Everton pritet t’i hapë dyer të reja lojtarit, i cili sipas të gjitha gjasave do të ketë përgjegjësi më të mëdhaja në vijën e sulmit.
Ndërkohë përsa i përket Asmir Begovic, 34 vjeçari do të jetë plani B i Everton në portë, në rast se Jordan Pickford nuk është i disponueshëm. Ish-portieri i Stoke dhe Chelsea ka të gjithë eksperiencën e duhur për të përballuar ndeshjet e nivelit të lartë, siç janë ato të Premier League. Afrimi i tij erdhi si nevojë, pas rikthimit të Robin Olsen te klubi i Romës, i cili e kishte huazuar atë tek Everton.
Begovic nënshkroi me Bournemouth në vitin 2017 duke u larguar nga Chelsea, dhe ka ende 1 vit kontratë me klubin e tij ekzistues. Ai zhvilloi 51 paraqitje sezonin e kaluar për klubin e tij, duke arritur dhe gjysmëfinalet e playoff-it në Championship. Gjithsesi, ekipi i tij u mund nga skuadra e Brentford.
