Braziliani Rodrygo ishte lojtari që theu zemrat e Manchester City, në gjysmëfinalen e dytë ndaj Real Madrid në Champions League. Talenti i galaktikëve shënoi dy gola vendimtarë që dërguan ekipin e Carlo Ancelottit në finalen e kompeticionit. Tashmë, Rodrygo do të ketë shansin të ndëshkojë Liverpool, për të triumfuar në Champions League. Kjo sfidë mjaft e rëndësishme për sulmuesin merr akoma më shumë kuptim, duke u nisur nga historia e tij e vjetër me “The Reds”.
Në vitin 2017, kur Rodrygo aktivizohej për skuadrën e Santos në Brazil, Liverpool bëri një ofertë zyrtare për kartonin e lojtarit. Oferta ishte vetëm 3 milionë euro dhe bisedimet mes Santos dhe klubit anglez ishin në faza të avancuara. Kjo shifër u konsiderua qesharake nga asistent-menaxheri i ekipit brazilian, Elano, i cili bindi sulmuesin që të qëndronte dhe 1 vit tjetër tek klubi i tij aktual.
Në verën e vitit 2018, Rodrygo la përfundimisht ekipin e Santos, por jo për t’iu bashkuar Liverpool. Ai firmosi me Real Madrid, teksa këta të fundit ofruan plot 45 milionë euro për kartonin e tij. Shifra ishte 15 herë më e lartë nga ajo që Liverpool ofroi për lojtarin kur ai ishte 16 vjeç. Rodrygo ka provuar veten e tij si një nga lojtarët më të talentuar të ekipit madrilen, pavarësisht minutave të kufizuara që ka patur si titullar. Tani, braziliani do të përballet në një finale europiane me ekipin që nënvlerësoi aftësitë e tij.
Mbetet të shohim nëse Rodrygo do të mund të përsërisë paraqitjen fantastike ndaj Manchester City dhe në finale. Fansat e Real Madrid po i referohen brazilianit si “Mr. Champions”, duke qënë se sulmuesi ka vërtetuar disa herë se nuk e ndien presionin e arenave të mëdha. Një triumf i Real Madrid përballë Liverpool ditën e shtunë do të ishte padyshim dhe një fitore individuale për Rodrygo.
