Për Pep Guardiolën, fitorja 1-0 përballë Chelsea ishte e një rëndësie mjaft të veçantë, dhe këtë gjë spanjolli nuk mund ta fshihte dot. Kjo ishte fitorja numër 221 e teknikut me City-n, që prej ardhjes së tij në Angli në vitin 2016, dhe është shifra më e lartë e arritur ndonjëherë nga një trajner i ekipit. Por akoma më special, ishte fakti që ky triumf erdhi përballë Chelsea-it të Thomas Tuchel.
“Qytetarët” treguan se pavarësisht startit jo dhe aq pozitiv në Premier League, nuk kanë ndërmend ta dorëzojnë lehtë kurorën e kampionit. Goli i fitores për City erdhi në minutën e 53’ me Gabriel Jesus dhe e gjithë ndeshja ishte një performancë e shkëlqyer nga djemtë e Guardiolës, të cilët përballuan me sukses presionin e Chelsea gjatë takimit.
Pep deklaroi pas ndeshjes:
“Ndonjëherë mendoj se na duhet një sulmues i mirëfilltë për të shënuar, por e rëndësishmja është mënyra si luajmë. Duhet të veprojmë si një grup i vetëm. Pak a shumë kjo u pa sezonin e kaluar, Sergio Aguero ishte i dëmtuar gjatë gjithë vitit dhe përsëri arritëm të fitonim Premier League-ën.”
Trajneri spanjoll gjithashtu shtoi:
“Luajtëm për njëri-tjetrin, vrapuam për njeri-tjetrin, dhe pasuam topin te njëri-tjetri. Janë vetëm 3 pikë sigurisht, por mënyra sesi luajtëm ishte e mirë. Është mënyra e duhur për të nisur këtë javë fantastike që kemi përpara.”
Dhe kjo javë vërtet do të jetë impenjative për të besuarit e Guardiolës, teksa do të udhëtojnë fillimisht në Paris, për t’u përballur me PSG, në ndeshjen e vlefshme për Champions League. Më pas, City do të përballet në një super duel me Liverpool, ditën e diel në Anfield. “Qytetarët” i kanë të gjitha shancet për të triumfuar edhe në këto përballje. Sidomos nëse dysha e mbrojtjes, Aymeric Laporte dhe Ruben Dias performojnë në të njejtin nivel si në fitoren ndaj Chelsea.
