Tifozët e Manchester United janë në festë, dhe arsyeja tashmë dihet. Cristiano Ronaldo pritet të bëjë një rikthim spektakolar në klubin ku u bë i njohur për herë të parë, dhe fansat e “Djajëve të Kuq” janë në “qiellin e shtatë”.
Në ndeshjen e luajtur përballë Wolves, në Molineux, ekzaltimi ishte i qartë, teksa një figurinë kartoni me përmasa reale e Cristiano Ronaldos gjendej mes fansave. United arriti të fitonte takimin 1-0, duke vazhduar performancat e mira në Premier League, por të pranishmit në stadium, duket se ishin më të gëzuar për rikthimin e Ronaldos, sesa për 3 pikët e marra.
Atmosfera ishte e njejtë dhe në vet kampin e United. Pas ndeshjes, ishte portiere David de Gea që komentoi mbi rikthimin e portugezit:
“Ardhja e tij përsëri në ekip është si një ëndërr, do të jetë fantastike. Në fakt që tani është, mund ta ndiesh në atmosferë. Le të shpresojmë se ai do të sjellë diçka speciale në skuadër, që të përmirësohemi akoma dhe më shumë.”
Ronaldo pritet të bëjë debutimin e tij të dytë me United, në date 11 shtator përballë Newcastle. Atmosfera në Old Trafford padyshim to të jetë magjike. Trajneri i United, Ole Gunnar Solskjaer dha komentin e tij në lidhje me rikthimin e portugezit:
“Ai është një djalë special, në fakt tani nuk është më një djalë, por ishte i tillë kur luanim së bashku. Lojtarët janë mjaft të lumtur, disa prej tyre kanë luajtur me Ronaldon në kombëtaren portugeze. Fansat gjithashtu janë të ekzaltuar. Kjo është ajo që ai bën, është një lojtar special.”
36 vjeçari portugez sipas të gjitha gjasave do të ketë të padiskutueshëm vendin e tij në formacion, dhe këtë gjë e konfirmoi Solskjaer:
“Ai nuk po nënshkruan për të ndenjur në stol. Ronaldo do të na ndihmojë të bëhemi një skaudër më e mirë.”
