Agjentja e bomberit Erling Haaland ka bërë një deklaratë surprizuese, që ka ngritur dyshime mbi të ardhmen e superstarit të Manchester City. Agjentja Rafaela Piment u shpreh se Real Madrid është destinacioni i ëndrrave për çdo lojtar. Komenti ka zgjuar dhe një herë zërat për një transferim potencial të lojtarit tek galaktikët.
Agjentja e Haaland u shpreh:
“Është Premier League dhe është edhe Real Madrid. Ata kanë diçka që i bën destinacionin e ëndrrave për lojtarët. Madridi e mban gjallë magjinë (e futbollit). Ata nuk kanë ndeshje javore kompetitive, por kanë Champions League-ën.”
Gjigandët spanjollë kanë fituar plot 5 herë kompeticionin prestigjoz që prej vitit 2014, ndërkohë që Manchester City, klubi aktual i Haaland, ende nuk ia ka dalë pavarësisht përpjekjeve në sezonet e fundit. Megjithatë, përveç dëshirës së madhe për të luajtur me Real Madrid, Piment u shpreh se Premier League mbetet kampionati i preferuar i lojtarëve. Ajo shtoi:
“Në fillim të karrierës time në këtë biznes, kur u thoja lojtarëve se do të luanin në Anglia ata më thoshin, ‘çfarë bëra gabim’. Ndërkohë tani, kur flas me lojtarët dhe i pyes se cili është objektivi i tyre ata më thonë se është Premier League. Nuk përmendin City, Chelsea apo Arsenal, thonë Premier League. Kjo është hera e parë në 25 vite që dëgjoj kaq shumë lojtarë të thonë se duan të transferohen në një kampionat, dhe jo në një klub specifik.”
Ndërkohë në lidhje me Haaland, një largim i sulmuesit nga Etihad nuk pritet të ndodhë, të paktën në të ardhmen e afërt. Gjithsesi, situata mund të komplikohet nëse City dënohet për akuzat mbi mashtrimet financiare të ngritura nga autoritetet e Premier League. Dënimi mund t’i pengojë “qytetarët” në rrugën e tyre drejt trofeve, dhe kjo padyshim që do të lërë një shije të hidhur tek Erling Haaland.