Bukayo Saka u shpreh se goli që shënoi në ditëlindjen e tij në Wembley, dhe suporti i tifozëve gjatë lojës do të thotë vërtet shumë për të. Djaloshi i kombëtares angleze kaloi një periudhë vërtet të vështirë, pas humbjes së penalltisë në finalen e Euro 2020 përballë Italisë. Gabimi i kushtoi trofeun “3 Luanëve”, por mesa duket sulmuesi e ka lënë tashmë pas eksperiencën negative.
Saka shënoi golin e katërt në fitoren 4-0 që të besuarit e Southgate arritën përballë modestëve të Andorrës. Pas ndeshjes lojtari i Arsenal u shpreh për mediat:
“Ishte dhurata perfekte e ditëlindjes. Jam shumë i lumtur me reagimin që mora nga tifozët. Tregon se sa krenarë janë për mua dhe kjo do të thotë shumë. Më bën që të jap gjithçka në fushë. Edhe në këto momente më duket sikur dëgjoj fansat që thërrasin emrin tim. Kjo është ajo që ëndërroja. Të luaja në Wembley përballë një stadium të mbushur dhe familjes time. Jam vërtet shumë i lumtur.”
Përveç golit, Saka impresionoi me vrapimet e tij dhe aftësinë për të depërtuar në mbrojtjen kundërshtare. Lojtari gjithashtu asistoi Jesse Lingard në golin e tij të dytë. Numri 1 i pankinës së “3 Luanëve”, Gareth Southgate gjithashtu komentoi paraqitjen e Saka përballë Andorrës:
“Ai u prit shumë mirë nga tifozeria përpara lojës dhe gjatë saj. Mund të shihet qartë sa popullor është dhe brenda ekipit. Nuk mendoj se ka një lojtar në dhomat e zhveshjes që nuk mendon pozitivisht për atë që Saka bëri gjatë verës.”
Ndërkohë, mbrojtësi Kieran Trippier konfirmoi se Saka është i forte mentalisht, dhe të gjithë lojtarët e ekipit biseduan me të pas përfundimit të Euro 2020. Lojtari i Atletico Madrid tha se Saka luan çdo ndeshje me një buzëqeshje në fytyrën e tij, dhe shokët e skuadrës e duan shumë për këtë gjë.
