Teksa po përgatitet për debutimin për herë të dytë me Manchester United, ylli portugez Cristiano Ronaldo ka deklaruar se nuk është rikthyer në klub për pushime. 36 vjeçari shënoi 118 gola në 292 ndeshje për Manchester United, gjatë aventurës së tij të parë në Angli, dhe duket se është gati për një tjetër kapitull me “Djajtë e Kuq”.
Futbollisti u shpreh për reporterët zyrtarë të klubit:
“Ndihem i aftë, jam gati! Kjo është arsyeja se përse jam këtu. Nuk kam ardhur për pushime. Herën e parë ishte një eksperiencë e bukur, fitova tituj dhe vesha këtë fanellë shumë herë. Jam këtu për të fituar përsëri.”
Portugezi gjithashtu shtoi:
“Kjo është një mundësi e mirë për mua, për tifozët dhe për klubin, që të hedhim një hap përpara. Jam gati dhe mendoj se do të luaj një rol të rëndësishëm në 3 apo 4 vitet e ardhshme.”
Cristiano Ronaldo pritet të debutojë përballë Newcastle, në ndeshjen që të besuarit e Solskjaer do të luajnë në shtëpinë e tyre. Transferimi për herë të dytë i futbollistit në klubin historik ishte një nga lëvizjet më spektakolare të markatos verore. Rivalët e United, Manchester City gjithashtu ishin në bisedime me agjentin e lojtarit, por Ronaldo vendosi të mos tradhëtojë klubin e tij të vjetër. Lëvizja i kushtoi 12.8 milionë paundë United, teksa largimi i sulmuesit ishte një surprizë dhe për tifozët e Juventus, të cilët prisnin që Ronaldo të qëndronte tek “Zonja e Vjetër”.
CR7 do të mbajë veshur të njejtën fanellë me numrin 7. Nën drejtimin e Sir Alex Ferguson, lojtari fitoi 3 tituj kampion në Premier League, 1 Champions League, 2 League Cups dhe 1 FA Cup. Megjithëse pas largimit të Ronaldos, United fitoi përsëri trofe, klubi nuk ka arritur të shpallet kampion në Angli, që prej sezonit 2012-2013.