Pas afrimeve të reja gjatë merkatos së verës, portieri i United, David de Gea, është shumë optimist për sezonin e ri të “djajëve”. Spanjolli është i mendimit se skuadra mund të garojë për titullin e Premier League, por dhe Champions League, duke qenë se në skuadër kanë tashmë lojtarë me mentalitet fitues.
Konkurrenca në ishull është e ashpër, me ekipe si Chelsea dhe Liverpool që së bashku me United, mbajnë vendin e parë të renditjes në Premier League me 13 pikë. Për të mos harruar kampionët në fuqi të Manchester City, të cilët pavarësisht disa hapave falsë këtë sezon, janë ende një kundërshtar shumë i fortë. Gjithsesi, De Gea është i bindur te cilësia dhe shpirti luftarak i shokëve të tij të ekipit. Ai deklaroi për Sky Sports:
“Kemi nënshkruar me lojtarë të mirë, por dhe përpara këtyre afrimeve kishim një skuadër mjaft cilësore. Jemi në krye të kampionatit dhe po luftojmë fortë në çdo ndeshje. Sigurisht që është e vështirë pasi është kampionati më i mirë në botë. Për ne çdo ndeshje është e rëndësishme, duam të luftojmë për trofetë e “mëdhenj”, për Premier League-ën dhe Champions League. Mendoj se kemi skuadrën e duhur, lojtarët dhe fansat. Atmosfera është fantastike dhe mendoj se klubi është në një moment shumë të mirë.”
Portieri i United komentoi gjithashtu mbi impaktin e derimëtanishëm të Cristiano Ronaldos në ekip. Për De Gean, kjo është diçka që mund të vihet re lehtësisht:
“Impakti duket që sot. Është fantastike që ai është kthyer në shtëpi. Ronaldo është një legjendë e klubit dhe mendoj se është një shembull fantastik për t’u ndjekur nga lojtarët e rinj. Ai është një lojtar i jashtëzakonshëm dhe është një ndjenjë e mirë ta shohësh teksa punon fort për të ndihmuar skuadrën. Me lojtarë me eksperiencë si ai apo Varane, ky mund të jetë një vit fantastik.”
