Pas eleminimit në Champions League nga Atletico Madrid, portieri i Manchester United, David de Gea, ka sinjalizuar se skuadra ka nevojë për një ndryshim të thellë. “Djajtë e Kuq” nuk kanë më mundësi të fitojnë një trofe këtë sezon, duke marrë parasysh pozicionin e tyre në Premier League. Kjo do të thotë se anglezët kanë 5 vite pa fituar një trofe madhor, që prej sezonit 2016-2017 ku nën drejtimin e Jose Mourinho fituan Europa League-ën.
Portieri De Gea u shpreh i frustruar me realitetin e skuadrës së United në sezonet e fundit. Ai u shpreh:
“Sigurisht që nuk është mirë. Ka shumë vite që nuk kemi fituar, madje as nuk kemi luftuar për trofe. Duhet të jemi të qartë se duam të arrijmë rezultate dhe të fitojmë trofe. Nuk duam thjesht të garojmë për një vend katërshen e parë në kampionat dhe më pas të eleminohemi në çerekfinalet e Champions League.”
Spanjolli shtoi:
“Pra na duhet më shumë nga të gjithë pasi ky klub është shumë më i madh, krahasuar me momentin ku jemi tani. Jemi ende larg luftës për vendet e para në Premier League apo Champions League, prandaj na duhet më shumë nga të gjithë.”
Manchester United është eleminuar në 6 nga 8 përballjet e fundit me eleminim direkt në Champions League. Ekipi i Ralf Rangnick rrezikon seriozisht që të mos luajë në kompeticionin elitar në sezonin e ardhshëm. “Djajtë e Kuq” mbajnë momentalisht vendin e pestë në kampionat, një pikë më pak se Arsenal në vendin e katërt. Megjithatë, “topçinjtë” kanë luajtur 3 ndeshje më pak.
Trajneri Ralf Rangnick pranoi gabimet e të tijëve në përballjen me Atletico, por në të njejtën kohë u shpreh i pakënaqur me shumë nga vendimet e arbitrit, të cilat sipas tij favorizuarn taktikat e spanjollëve për të humbur kohë, pasi kaluan në avantazh.