Trajneri i Manchester United, Erik ten Hag, ka komentuar dhe një herë tjetër përjashtimin e Cristiano Ronaldos nga ndeshja e ardhshme me Chelsea. Tekniku hollandez konfirmoi lajmin e mediave se CR7 refuzoi të hynte në lojë si zëvëndësues ndaj Tottenham, dhe kjo është pikërisht arsyeja se përse portugezi është lënë jashtë listës së lojtarëve për sfidën e së shtunës.
Gjithsesi Ten Hag refuzoi të komentonte më tej situatën mes tij dhe Ronaldo, duke u munduar të mbajë private detajet e bisedës. Ai u shpreh:
“Kjo bisedë është mes meje dhe Cristianos. Mesazhi është i qartë. Por në të njejtën kohë, ai (Ronaldo) mbetet një pjesë e rëndësishme e ekipit. Unë jam trajneri, jam përgjegjës për kulturën këtu. Duhet të vendos standarte dhe vlera të cilat duhet t’i kontrolloj. Jemi në një skuadër.”
Ndërkohë Ten Hag la të nënkuptohej se incidenti ishte i ngjashëm me atë që ndodhi në ndeshjen ndaj Rayo Vallecano në Europa League, ku Ronaldo u pa përsëri i indinjuar. Trajneri i United shtoi:
“Pas sfidës me Rayo Vallecano ishte e papranueshme. Por nuk ishte vetëm ai (Ronaldo). Herën e dytë duhet të ketë pasoja. Kjo ndodhi. Nesër Ronaldo do të mungojë, por mendoj se është e rëndësishme për mentalitetin dhe sjelljen e ekipit, dhe tani duhet të përqëndrohemi tek Chelsea.”
Veprimet e portugezit u kritikuan nga shumë personalitete sportive, ndërsa vet CR7 u shpreh se e rrëmbeu momenti i lojës në minutat e fundit me Tottenham, por gjithsesi nuk kërkoi falje. Ten Hag ndërkohë tha se kjo është pjesë e të luajturit futboll në nivele të larta, dhe se futbollistët nuk duhet të shpërqëndrohen nga zhurma të jashtme apo situata të vështira. Mbetet të shohim nëse superstari portugez do të mund të fitojë përsëri besimin e Ten Hag.
