Erik ten Hag është shprehur se kur erdhi për herë të parë tek Manchester United, ekipi nuk kishte një kulturë të mirë. Tekniku hollandez u shpreh në një intervistë se pronarët e klubit kanë kërkuar një udhëheqje më strikte nga ana e tij për lojtarët. Komentet erdhën në intervistën e parë për shtyp, pas incidentit me Jadon Sancho.
Ky i fundit bëri një deklaratë publike, duke i dalë kundër trajnerit në mënyrë indirekte, dhe duke protestuar mospërfshirjen e tij në formacionin e United. Klubi doli me një deklaratë zyrtare më vonë, ku bëri me dije se Jadon Sancho do të trajnohet larg skuadrës së parë, derisa të zgjidhen problemet mes tij dhe trajnerit hollandez. Megjithatë, ky i fundit u mundua të shmangë diskutimin mbi këtë situatë gjatë konferencës për shtyp. Ten Hag komentoi:
“Detyra ime është të vendos standartin. Rregulla strikte janë ato që më ka kërkuar klubi, sepse nuk kishte kulturë të mirë përpara ardhjes time sezonin e kaluar. Kuptohet, nuk është asnjëherë vetëm 1 gabim, është një proces përpara se të arrihet në vendosjen e rregullave strikte.”
Ten Hag gjithashtu u pyet për situatën e brazilianit Antony, i cili do të shkëputet për një periudhë nga ekipi, për të sqaruar akuzat që rëndojnë mbi të për dhunë. Ten Hag nuk dha detaje mbi ngjarjen, por u shpreh se ekipi mbetet pozitiv pavarësisht vështirësive:
“Disa herë ke situata të vështira gjatë një sezoni, lojtarët dëmtohen ose për një farë arsyeje nuk janë të disponueshëm për të krijuar një skuadër. Ekipi është në gjendje të mirë dhe lojtarët që janë të disponueshëm janë të motivuar për të dhënë një performancë të mirë.”
Tekniku u pyet në fund nga reporterët se kur mund të rikthehet Sancho në ekipin e parë, por hollandezi refuzoi të përgjigjej.