Trajneri i Manchester United ka folur për mediat, pas një tjetër disfate turpëruese në Old Trafford, kësaj rradhe me rezultatin 0-3 ndaj Bournemouth. Ten Hag pranoi se ishte i acaruar dhe i zhgënjyer nga rezultati, si dhe pranoi faktin se “skuadra nuk ishte në nivelin e duhur për të qënë konsistente”. Tekniku hollandez u shpreh pas sfidës:
“Si një skuadër, nuk jemi mjaftueshëm të mirë për të qënë konsistentë. Jam i acaruar, dhe padyshim i zhgënjyer. Prisja dicka tjetër. Mënyra sesi e nisëm lojën nuk ishte e mirë, ishte shumë e dobët…Si një grup, duhet të forcohemi, duhet të përmirësohemi. Duhet të bëhemi më të fortë…Në këtë kampionat, nëse nuk luan në nivelet më të larta vritesh.”
Kapiteni i United, Bruno Fernandes, gjithashtu e cilësoi paraqitjen ndaj Bournemouth si të papranueshme. Fernandes gjithashtu tha se fishkëllimat e fansave në fund të takimit ishin normale duke marrë parasysh paraqitjen.
Manchester United ka humbur plot 11 ndeshje në të gjitha kompeticionet këtë sezon. Disfata ndaj Bournemouth ishte humbja e gjashtë në 16 ndeshje të luajtura deri më tani në Premier League. Por përballjet që vijnë në vijim duken akoma më të vështira për “Djajtë e Kuq”, dhe fansat kanë arsye për t’u ndierë të shqetësuar.
United do të sfidojë Bayern Munich në Champions League këtë fundjavë, dhe vetëm një fitore i hyn në punë anglezëve për t’u kualifikuar. Më pas, të besuarit e Ten Hag i presin transferta mjaft të vështira ndaj Liverpool dhe West Ham në kampionat, si dhe një sfidë e vështirë ndaj Aston Villa në shtëpi.
Pozitat e Ten Hag si trajner gjithashtu janë tashmë në rrezik, teksa zërat për shkarkimin e tij janë bërë gjithnjë e më të zhurmshme. Në rast se United vazhdon të regjistrojë rezultate negative si ai ndaj Bournemouth, hollandezi mund të shkarkohet pa u mbyllur sezoni.
