Opsionet e shumta në dispozicionin e tij, duket se vërtet e kanë vënë në vështirësi trajnerin e përfaqësueses angleze, Gareth Southgate. Pavarësisht barazimit me Hungarinë, fitorja 5-0 përballë Andorrës, tregoi dhe një herë tjetër potencialin e lartë të anglezëve, sidomos në repartin ofensiv.
Southgate deklaroi për lojtarët e tij:
“Kam një dhimbje koke dhe më duket sikur bëj një krim, sa herë që më duhet të zgjedh lojtarët titullarë për një takim. Gjithmonë është shumë e vështirë. Kemi shumë lojtarë të mirë dhe konkurrenca është e fortë. Shumica e futbollistëve e kanë fituar vet besimin dhe reputacionin e tyre, dhe për këtë gjë ndihem mirë.”
Por pavarësisht vështirësive të Gareth, e ardhmja duket vërtet premtuese për kombëtaren angleze, mosha mesatare e të cilës është 25 vjeç.
Ndërkohë, gjatë konferencës për shtyp të trajnerit, ishte i pranishëm dhe Mason Mount. Mesfushori që aktivizohet me ekipin e Chelsea në Premier League, është zyrtarisht pjesë e listës me 30 futbollistët kandidatë për çmimin prestigjoz të Topit të Artë. 22 vjeçari kaloi një sezon mjaft të suksesshëm, pasi fitoi Champions League me klubin e tij, si dhe ndihmoi Anglinë të mbërrinte deri në finalen e Euro 2020. Lojtari tha për mediat:
“Ishte speciale. Të shihje atë listë dhe të ishe pranë atyre emrave mu duk si një ëndërr. Kur punon fort për shumë vite, je i dedikuar dhe shikon diçka të tillë, kupton se çdo gjë në fund ia ka vlejtur.”
Mount gjithashtu u pyet nëse beson se ka shance reale për të fituar trofeun prestigjoz. Ai u përgjigj:
“Nuk e besoj, por asnjëherë nuk i dihet. Ajo që ka më shumë rëndësi për mua është të vazhdoj të punoj, në mënyrë që të arrij nivelet që i kam caktuar vetes, dhe pse jo, të shkoj akoma më tej.”
