Trajneri i Manchester City, Pep Guardiola, ka thënë se është shumë i lumtur me ekipin e tij, pavarësisht se në këtë merkato vere nuk ia dolën të afronin një sulmues të nivelit të lartë. Kampionët e Premier League u përfolën gjatë për afrimin e mundshëm të Harry Kane nga Tottenham, por sulmuesi i Anglisë zgjodhi të qëndrojë dhe këtë sezon me Spursat.
Ndërkohë, ditët e fundit “qytetarët” u përfshinë me bisedime me Juventus, për afrimin e Cristiano Ronaldo. Pavarësisht kësaj, ylli portugez zgjodhi rivalët e Manchester United, duke u rikthyer te klubi ku fitoi për herë të parë “Topin e Artë”. Gjithsesi, “dështimet” e merkatos duket se nuk e kanë shqetësuar Pep Guardiolën:
“Jam pafundësisht i lumtur me skuadrën që kam, tejet i kënaqur. Jemi i njejti ekip, përveç Sergio që u largua, dhe Jack Grealish që erdhi. Çdo gjë mund të ndodhë, por për mendimin tim, jemi mjaft mirë kështu siç jemi.”
Trajneri spanjoll shtoi në lidhje me Harry Kane:
“Klubi bëri gjithçka që ishte e mundur, por nuk patëm mundësi të diskutonim për një ofertë me Tottenham. Kjo sepse ata nuk donin të negocionin. Kur një skuadër nuk do të negociojë, nuk ka më asgjë për të thënë.”
Megjithëse, pa një sulmues të ri në këtë merkato, City arriti të shënojë plot 5 gola në fitoren e thellë 5-0 që arriti përballë Arsenal. Pas ndeshjes Guardiola u shfaq i kënaqur, por tha se ekipi i tij ka mundësi për të bërë më mirë. Mbrojtja e ekipit të Mikel Arteta ishte në një formë mjaft të dobët, dhe kjo i dha mundësi City të shfrytëzojë hapësira të pazakonta në prapavijë. Nëse dhe në vijim, kundërshtarët e “qytetarëve” do të ofrojnë të njejtën paraqitje, Guardiola nuk do të ketë aspak nevojë për një sulmues të mirëfilltë në ekipin e tij.