Presidenti i Barcelonës, Joan Laporta, ka bërë një deklaratë që ka lumturuar padyshim shumë fansa të klubit katalanas. Në një intervistë të fundit për ESPN, Laporta deklaroi se kapitulli i Leo Messi tek Barcelona ende nuk është mbyllur, duke i dhënë kështu jetë idesë së rikthimit të yllit argjentinas në Camp Nou.
Messi i dha fund aventurës së tij 21 vjeçare tek klubi spanjoll, pasi këta të fundit nuk kishin mundësi financiare për të rinovuar kontratën e tij. 6 herë fituesi i Topit të Artë iu bashkua më pas PSG, duke ndihmuar kampionët e Francës në triumfin e tyre në Ligue 1. Por pavarësisht kësaj, sezoni që lamë pas nuk ishte i lehtë për argjentinasin, teksa përshtatja në ambientin e ri rezultoi e vështirë. Paralelisht kësaj, zërat për një rikthim tek Barcelona asnjëherë nuk rreshtën së pushuari dhe tashmë, këtë gjë e ka konfirmuar dhe presidenti Laporta. Ai u shpreh:
“Messi ishte gjithçka. Për Barcelonën ai ishte mbase lojtari më i mirë i të gjithë historisë. Për mua ai krahasohet vetëm me Johan Cruyff. Por do të ndodhte një ditë. Duhej të ndërmerrnim një vendim bazuar në situatën që trashëguam me klubin.”
Presidenti i katalanasve shtoi:
“Shpresoj që kapitulli i Messit të mos jetë mbyllur. Mendoj se është përgjegjësia jonë që të gjejmë një moment për ta rregulluar këtë kapitull, i cili qëndron ende i hapur… Në këtë mënyrë mund të ketë dhe një fund më të bukur…Si president i Barcelonës unë duhet të bëj detyrën time, por në nivel personal mendoj se ia kam borxh atij (Messit).”
Laporta gjithashtu komentoi gjendjen ekonomike të klubit, duke dhënë sinjale pozitive mbi të ardhmen. Ai tha se nga shitja e të drejtave televizive Barcelona ka përfituar shuma të konsiderueshme monetare, dhe ekipi është tashmë në një proces ringritjeje.
