Jose Mourinho ka thënë se nga të gjitha klubet që ka drejtuar, Tottenham është i vetmi ekip për të cilin portugezi nuk ka një ndjesi dhe lidhje të veçantë. Trajneri i Romës u shkarkua nga klubi londinez në vitin 2021, pas vetëm 1 viti e gjysmë nën drejtimin e ekipit. Kujtojmë se Mourinho ka drejtuar klube elitare në Europë si: Real Madrid, Chelsea, Inter, Manchester United etj. “The special one” u shpreh për mediat në një komunikim të fundit:
“Shpresoj që fansat e Tottenham mos ta marrin këtë për keq, por i vetmi klub në karrierën time për të cilin ende nuk kam një ndjenjë të thellë është Tottenham. Mbase për shkak se stadiumi ishte bosh gjatë periudhës së Covid. Mbase sepse zoti Levy (presidenti i klubit) nuk më la të fitoja një finale dhe të ngrija një trofe.”
Mourinho u shkarkua vetëm 1 javë para finales së Carabao Cup, ku Tottenham u mposht nga Manchester City me rezultatin 1-0. Trajneri portugez mori më pas drejtimin e italianëve të Roma, duke triumfuar në Europa Conference League, në edicionin e parë të kompeticionit të ri europian.
Jose Mourinho ka tashmë një tjetër shans për të fituar një trofe prestigjoz europian, teksa Roma do të përballet me Sevilla në finalen e Europa League në Budapest. Tekniku u pyet në konferencën për shtyp, dhe për të ardhmen e tij në krye të klubit italian. Ai u përgjigj duke mos dhënë shumë detaje:
“Do të jemi gjithmonë të lidhur bashkë, ashtu siç jam i lidhur me të gjitha klubet e mia të mëparshme, përveç klubit të zotit Levy… Mbase njerëzit mund të thonë se nuk mund t’i duash të gjitha klubet, por jo, unë i dua të gjitha.”
