Trajneri i Liverpool, Jurgen Klopp, është i bindur se tifozët e “The Reds” do të respektojnë minutën e heshtjes që do të mbahet në nderim të Mbretëreshës Elizabeth, në ndeshjen përballë Ajax. Sezonin e kaluar, në finalen e FA Cup, tifozët anglezë bojkotuan dhe brohoritën kundër këngëve në nderim të Mbretëreshës si “Abide With Me” dhe “God Save the Queen”.
Asokohe, kryeministri britanik Boris Johnson, dënoi sjelljen e tifozëve të Liverpool. Klopp ndërkohë ka përsëritur së fundmi se një minutë heshtje është gjëja e duhur për t’u bërë. Gjermani tha për mediat:
“Nuk mendoj se njerëzit tanë kanë nevojë për çfarëdo lloj këshille nga unë për të treguar respekt. Ka shumë shembuj ku tifozët treguan ekzaktësisht respektin e duhur. Një që më surprizoi dhe që më bëri vërtet krenar, ishte kur luajtëm sezonin e kaluar me Manchester United, dhe Cristiano Ronaldo kishte një situatë vërtet të trishtë në familjen e tij. Dhe kjo është ajo që pres. Për mua, është e qartë ajo që duhet të bëjmë…”
Shkurtin e vitit të kaluar, Klopp humbi mamanë e tij në moshën 81 vjeçare, dhe e kishte të pamundur të merrte pjesë në ceremoninë mortore, për shkak të kufizimeve të lëvizjes nga Covid-19. Tekniku gjerman tha se e kupton mjaft mirë trishtimin që anglezët po kalojnë dhe shtoi:
“Unë jam 55 vjeç dhe ajo është e vetmja Mbretëreshë e Anglisë që kam njohur. Nuk e kam njohur personalisht, por nga ato që mund të shohësh, ajo ishte një grua shumë e dashur, e ngrohtë, dhe kjo është e gjitha që duhet të di. Për shkak të eksperiencës time personale para jo shumë kohësh…nuk ka të bëjë me atë se çfarë mendoj unë, por se çfarë po ndiejnë personat që janë shumë më afër saj, dhe unë e respektoj shumë këtë dhimbje…”
