Trajneri i Liverpool, Jurgen Klopp, ka thënë se nuk e kupton qëndrimin e shumë personave, që refuzojnë vaksinën ndaj Covid 19. Deklarata erdhi pas bërjes publike të statistikave interesante në Premier League, ku deri më tani, më pak se gjysma e lojtarëve të të gjitha klubeve janë vaksinuar. Trajneri gjerman u shpreh se 99% e lojtarëve të Liverpool e kanë bërë vaksinën, dhe nuk ka qenë ai që u ka mbushur mendjen. Klopp tha:
“Nuk e kuptoj pse thonë se vaksina cënon lirinë. Sepse nëse është kështu, mund të themi të njejtën gjë për konsumin e alkoolit kur ngasim makinën. Është diçka që e kemi pranuar. Unë e mora vaksinën pasi isha i shqetësuar për veten time, por dhe të tjerët rreth meje. Nëse marr virusin dhe vuaj prej tij, është faji im. Nëse e marr dhe ua shpërndaj të tjerëve është përsëri faji im, dhe jo i tyre.”
Këtë javë u bë e ditur se Premier League, po mendon idenë e shpërblimit të klubeve, në të cilat numri i lojtarëve të vaksinuar është më i lartë. Kjo pasi vaksinimi po kthehet qartësisht në një kusht të detyruar, dhe për shumë autoritete qeveritare në Angli. Në një email që u është dërguar ekipeve, zyrtarë të kampionatit anglez bënë me dije se vetëm 7 skuadra kanë arritur të vaksinojnë më shumë se 50% të lojtarëve të tyre.
Klopp ndërkohë përsëriti:
“Mund të them se jemi 99% të vaksinuar. Nuk ishte nevoja që të bindja lojtarët, ishte një vendim që ekipi e mori natyrshëm. Nuk mbaj mend të kem folur me ndonjë lojtar për t’a bindur të marrë vaksinën, pasi unë nuk jam një doktor. Ajo që do të bëja do të ishte t’u jepja këshillën time, por në këtë rast nuk ishte e nevojshme.”
