Lionel Messi ka deklaruar se ëndrra e tij është të fitojë dhe një herë Champions League-ën, por kësaj rradhe me Paris St-Germain. Në konferencën e tij të parë për shtyp si lojtar i parizienëve, argjentinasi u shfaq optimist dhe i lumtur për të ardhmen e tij në klubin e ri. Ai bëri të ditur për mediat:
“Qëllimi dhe ëndrra ime është të fitoj Champions League-ën edhe një herë. Për mua ky ndryshim pas kaq shumë kohësh ishte i vështirë. Por, në momentin që erdha këtu, u ndjeva shumë i lumtur, dhe dua menjëherë të filloj të stërvitem me skuadrën.”
Kujtojmë se PSG ende është në kërkim të trofeut të parë të Champions League. Francezët iu afruan shumë triumfit në finalen e vitit 2020, por nuk mundën t’i shkonin deri në fund, duke u mposhtur nga gjermanët e Bayern Munich. Messi ndërkohë ka fituar 4 tituj të Champions League me Barcelonën, ku titulli i fundit kampion erdhi në vitin 2015. Argjentinasi gjithashtu tha:
“Kam një dëshirë shumë të madhe për të luajtur. Jam vërtet i paduruar. Ende dua të fitoj, ashtu siç kam bërë që në momentet e para të karrierës time. Mendoj se ky klub është i gatshëm për të luftuar për të gjitha trofetë. Ky është dhe qëllimi im, dua ende të fitoj dhe të rritem si lojtar, prandaj iu bashkova PSG.”
Gjithsesi, Leo shprehu dhe një herë dëshirën e tij për t’u rikthyer një ditë, përëri në Barcelonë:
“Barcelona është shtëpia ime, kam qenë atje që fëmijë dhe kam jetuar kaq shumë gjëra. Nuk e di nëse do të përballemi me njëri-tjetrin, por do të kisha dëshirë që të rikthehesha në Barcelonë. Do të jetë vërtet e çuditshme që të luaj atje me një fanellë tjetër, por le të shohim se çdo të ndodhë.”