Braziliani i Tottenham, Lucas Moura, është i mendimit se presioni i madh në rrjetet sociale ka një ndikim shumë negative në shëndetin mendor të futbollistëve. Në një intervistë për BBC, mesfushori u ndal gjatë te ky problem, duke e lidhur me abuzimin online që mori treshja e Anglisë, Marcus Rashford, Jadon Sancho dhe Bukayo Saka, pas humbjes së penalltive në finalen e Euro 2020. Moura tha:
“Është viti 2021 dhe ende po shohim gjëra shumë të këqija. Duhet të ndalojmë! Duhet t’i mësojmë fëmijëve tanë të sillen mirë. E di që është e vështirë. Fansat komunikojnë me lojtarët në rrjetet sociale. Por disa fansa bëjnë gjëra të këqija. Dhe organizatorët e turneve duhet të bëjnë diçka në lidhje me këtë gjë.”
Lucas Moura gjithashtu u pyet mbi zhvillimet e fundit te Tottenham. Kujtojmë se klubi ka kaluar një periudhë të vështirë, teksa trajneri portugez Nuno Espirito Santo është menaxheri i tretë në 20 muaj për Spursat. Gjithsesi, Moura nuk duket i shqetësuar:
“Ai (Nuno) është një trajner shumë i zgjuar. Ka bërë një punë shumë të mirë me Wolves dhe mund të bëjë të njejtën gjë dhe këtu. Të gjithë kanë një stil të ndryshëm. Mourinho ishte shumë ndryshe, Nuno është më i qetë.”
Ndërkohë situata është e komplikuar te klubi anglez dhe përsa i përket lëvizjeve të merkatos. Erik Lamela dhe Toby Alderweireld, dy lojtarë veteranë të Tottenham kanë lënë klubin. Ndërkohë spekullimet vazhdojnë për një transferim të mundshëm të Harry Kane drejt Manchester City.
Por nuk ka vetëm zhvillime negative. Koreani Son Heung-min rinovoi me ekipin deri në vitin 2025. Ndërsa Bryan Gil dhe portieri italian Pierluigi Gollini duket se i kanë sjellë freski dhe një frymë të re Tottenham. Spursat ende kanë kohë për të bërë një tjetër goditje në merkato, sidomos në rastin e zyrtarizimit të transferimit të Kane, që do të mbushte arkën e klubit.
